Qazaqstan-Shveısarııa matchynyń shymyldyǵyn 21 jastaǵy Dmıtrıı Popko men Genrı Laaksonen ashty. ATR jarııalaǵan tizimge kóz júgirtsek, bizdiń Popko – 231-shi, al Laaksonen 123-shi orynǵa jaıǵasqan eken. Degenmen reıtıngtegi alshaqtyqqa qaramastan, kezdesý óte tartysty ótti. Tolyq úsh saǵatqa sozylǵan básekeniń alǵashqy setin jeńispen bastaǵan jerlesimiz, kelesi kezeńde de jeńiske jetý úshin biraz ter tókti. Dese de, bul set te Popkonyń enshisine jazyldy. Bul jerde shveısarııalyq sportshynyń jankeshtiligin aıta ketken jón. Ol qarsylasynyń oılastyrǵan ədisin der kezinde baıqap, qarsy soqqy jasap ta úlgerdi. Úshinshi sette Laaksonen jınaqylyq tanytyp, bul setti óz paıdasyna sheshti. Əıtkenmen, Dmıtrıı Popko ózinen tórt jas úlken ári reıtıngte joǵary ornalasqan əriptesine qaraǵanda jigerli oıyn kórsetip, 6:2, 7:6, 3:6, 7:5 esebimen basym tústi. Sóıtip Qazaqstan quramasyna alǵashqy jeńisti syılady.
Shveısarııa jankúıerleriniń kóńilin kúpti etken birinshi kezdesýden keıin, Qazaqstan quramasynyń birinshi raketkasy Mıhaıl Kýkýshkın (ATR reıtınginde 73-orynda) Shveısarııanyń ortan qol tennısshisi Adrıan Bodmerge (485) qarsy shyqty. Birden aıtaıyq, Kýkýshkın bul kezdesýde 4:1 esebimen jeńiske jetip, birinshi kúnniń qorytyndysy boıynsha esepti 2:0-ge jetkizdi. Alaıda tablodaǵy kórsetkishke qarap, jeńis bizdiń tennısshige ońaı keldi dep aıtýǵa bolmaıdy. Adrıan Bodmer alǵashqy sette jeńiske jetkenimen, qarsylasyna qaraǵanda tájirıbesi mol bizdiń tennısshi 3:6, 6:3, 6:2, 6:3 esebimen basym tústi.
Jarystyń ekinshi kúni juptasyp óner kórsetýde Aleksandr Nedovesov pen Tımýr Habıbýllın dýeti Mark-Andrea Hýsler men Lýka Margarolıge qarsy kortqa shyqty. Jankúıerlerdiń qyzý qoldaýyna ıe bolǵan jerlesterimiz alǵashqy eki sette qarsylastarynan 6:4, 6:4 nátıjesimen basym tústi. Jeńis ýystarynan sýsyp bara jatqanyn bilgen Shveısarııa quramasynyń tennısshileri tez esin jıyp, kelesi eki setti óz paıdalaryna sheshti. Tórtinshi setten keıin eki quramanyń nátıjeleri teńesti. Sońǵy sette jeńis eki quramaǵa da aýadaı qajet edi. О́ıtkeni sheshýshi sette Qazaqstan quramasy jeńiske jetse, merziminen buryn 1/4 fınalǵa shyǵady, al Shveısarııa tennısshileri bul matchty óz paıdalaryna jazatyn bolsa, olarda da kelesi kezeńge shyǵý úshin úmit oty qaıta paıda bolar edi. Degenmen aldaryna jeńiske jetý degen naqty maqsat qoıǵan otandastarymyz besinshi sette jınaqy oıyn órnegin kórsetip, qarsylastarynan jeńisti julyp aldy. Qorytyndy esep – 6:4, 6:4, 3:6, 6:7, 6:3. Sóıtip Dıas Dosqaraev jetekshilik etetin qurama jarystyń alda bolatyn eki kezdesýdiń nətıjesine qaramastan, Devıs kýbogynyń shırek fınaldyq kezeńine joldama aldy.
Týrnırdiń sońǵy kúninde eki match oınaldy. Bul kúni birinshi bolyp kortqa Roman Hasanov shyǵyp, Andrea Hýsleradan 3:6, 1:6 esebimen jeńilip qaldy. Al Dmıtrıı Popko Adrıan Bodmerdi 7:6, 1:6, 10:6 nátıjesimen jeńdi.
Endi qurama jigitteri sáýir aıynda jartylaı fınalǵa shyǵý úshin baq synaıdy.
Aıta keteıik, Qazaqstan quramasy Devıs kýbogy aıasynda Shveısarııa quramasymen osymen úshinshi ret kezdesti. Eń alǵash 2010 jyly Shveısarııany jeńgennen keıin tarıhta tuńǵysh ret álemdik topqa shyqqan edi. Al 2014 jyly Jenevada ótken týrnırdiń shırek fınalynda otandastarymyz 2:3 esebimen ese jibergen edi. Mine, endi eki qurama 1/8 fınalda úshinshi ret jolyǵyp, bul kezdesý Qazaqstan quramasynyń jeńisimen aıaqtaldy.
Dıas DOSQARAEV, Qazaqstan quramasynyń kapıtany:
– Sóz joq, jaqsy match boldy, jigitter jarady. Árıne, oıynda azdaǵan burylystar boldy. Shveısarııa quramasy da óte tájirıbeli komanda. Margarolı tek bir ret qana qatelesti. Kelesi kezeńde de bizdi ońaı qarsylas kútip turǵan joq. Onyń ústine shırek fınal oıyny syrt alańda ótedi.
Álı BITО́RE,
«Egemen Qazaqstan»
