2018 jylǵy 2 aqpanda Eýropalyq odaq pen Qazaqstan Respýblıkasy arasynda dıplomatııalyq qarym-qatynastardyń ornaǵanyna 25 jyl toldy. Osy kúnnen bastap eki tarap arasynda tyǵyz ári ózara tıimdi yntymaqtastyq qalyptasa bastady.
Shırek ǵasyr ishinde Eýropalyq odaq pen Qazaqstan arasynda qarym-qatynastyń berik sharttyq-quqyqtyq bazasy quryldy. Onyń irgetasy 2015 jylǵy 21 jeltoqsanda qol qoıylǵan EO men QR arasyndaǵy Keńeıtilgen áriptestik jáne yntymaqtastyq kelisimi bolyp tabylady.
2016 jylǵy 1 mamyrdan bastap jartylaı qoldanysqa engen bul qujat ekijaqty qarym-qatynastyń jańa kezeńge bet alǵanyn kórsetedi jáne halyqtarymyzdyń ıgiligi úshin kóptegen salalardaǵy yntymaqtastyqtyń quqyqtyq negizin eleýli keńeıtti. Qazaqstan EO-men osyndaı Kelisimge qol qoıǵan Ortalyq Azııanyń tuńǵysh memleketi boldy.
Kelisim Qazaqstan men Eýropa arasyndaǵy uzaq merzimdi baılanystardy qarqyndatýdyń lokomotıvi bolýǵa arnalǵan. Qujat saýda, ekonomıkalyq jáne ınvestısııalyq yntymaqtastyq úshin qolaıly jaǵdaılar jasaýǵa, sondaı-aq saıası jáne adam quqyqtary salasyndaǵy dıalogty keńeıtýge baǵyttalǵan.
Eýropalyq odaq pen Qazaqstan Ortalyq Azııa boıynsha EO Strategııasynyń iske asyrylýyna birlese qoldaý bildirýde. Adamı kapıtaldy damytý, bilim berý, qorshaǵan ortany qorǵaý, sý resýrstaryn utymdy paıdalaný, óńirdiń tıimdi kólik-logıstıkalyq ınfraqurylymyn qalyptastyrý, qaýip-qaterlerge qarsy kúres máselelerine erekshe kóńil bólinip otyr.
Eýropalyq odaq pen Qazaqstan odan ári ortaq qundylyqtarǵa negizdelgen ózara is-qımyl jasaý úshin zor áleýettiń bar ekendigine senimdi jáne áriptestik pen yntymaqtastyqtyń barlyq nysandaryn dáıekti jetildirýdi jalǵastyrýǵa daıyn ekenin bildiredi.
«Egemen aqparat»
