Kóshýge áreket jasalyp, kólikter qaqpadan enip, zattar túıdek-túıdek teńge aınalyp, býynshaq-túıinshekter kólikke artyla bastaǵanda ǵana kóshirisip jatqandar baılaýly turǵan Arlanǵa nazar aýdardy.
Biri «bosatyp jibereıik!» dese, endi biri «bosqa qańǵyrtqansha atyp tastaǵan jón shyǵar» dedi. Ittiń aıanyshty túrin kórgen kórshisi «jańa ıesi tabylyp qalar, obal-dy» dedi. Ne kerek Arlan ózin ıesi qalaǵa áketpeıtinin anyq túsindi. Iesi «asyl tuqymdy ıt asyrasam kerek bolyp qalar» dep moınyndaǵy qarǵybaýyn aǵytyp aldy da, Arlandy bosatyp jiberdi. Arlan ıesin qımaı kósh artqan kóliktiń sońynan aýyldyń shyǵa beris qaqpasyna deıin qaptaldasa júgirip otyrdy. Aqyry arqyraǵan kólikke ilese almaı jol boıynda shoqıyp uzaq otyrdy. Osy sátte Arlandy jaqyn baryp kórgen pende bolsa, onyń kózindegi muńǵa shylanǵan jasty kórer edi. Sodan beri ortalyqtaǵy bazardyń kúl-qoqysyn kezip júrgeni. Ilýde bolmasa eshkim esirkep nan, súıek-saıaq tastaı qoımaıdy. Arlan tańǵy eleń-alańda, keshki apaq-sapaqta kóshege shyqpaıtyn bolǵan. О́ıtkeni bul ýaqyttarda tars-turs atylatyn otqarý asynǵan adamdar júredi. О́tken joly sondaı jandarǵa kezigip jambasyna oq súıketip alyp, ázer aman qalǵan bolatyn. Aýyq-aýyq ózderi turatyn úıdiń qańyraǵan jurtyn aınalyp shyǵady. Úı áli ıesiz. Sharbaqtyń irgesinen kirip shyǵatyn tesigi bar. Iesi kósherde kórshilerine daıyndap «alatyn adam kelse, saýdalasa ber. Bizge habaryn aıt!» dep kiltin de tapsyryp ketken. Arlannyń ıesi qalaǵa kóshipti degen aty bolmasa, qalanyń shetinde kádimgi aýyldaǵydaı jer úıde turady eken. Kóship barǵaly tirligi ónbeı, jumysy keri kete beripti. Jandary ashyǵan árkim-árkim mańdaıdaǵy jazýly taǵdyrdan, qoǵamnan, anadan-mynadan kórip jubatpaq ta bolypty. Aýyldan habarlasqan kórshisi: «Sender kóship ketkeli ıt úıge jan balasyn jolatar emes. Eshkimdi qaýyp nemese julmalap jatqan joq. Alaıda yryldap, ses kórsetip úıge jaqyndatpaıdy. Álgi ıesiz ıt-mysyqtardy aýlaıtyn mekeme jumysshylaryn shaqyrǵan mezette Arlan izim-qaıym joq bolyp ketedi. Týra bir eles sııaqty.Úıleriń ázir óter emes», dedi. Osy sátte Arlannyń ıesiniń sanasyna áldebir ushqyn oı sap ete qaldy.
Tańerteńgi shaı ústinde otbasy múshelerine qarap: «Úlken bala kelinmen osynda qalada qalsyn! Qalǵanymyz aýylǵa qaıta kóshemiz. Yrys pen nesibeni, kıe men qazynany jurtqa qaldyryp ketken kinániń kilti ózimizde eken ǵoı», degen Arlannyń ıesi elge bet almaqqa bekindi.
Aýyldyń ortasyndaǵy qara shańyraqtyń qaqpasynan engende esiginiń aldynda artyq eti qalmaı, arsa-arsasy shyǵyp júnjip ketken Arlandy kórip: «Keshir meni, qarashańyraǵymnyń qazynasy, otbasy, oshaǵymnyń kıesi», dep jylap jibergen ıesi Arlandy qapsyra qushaqtaı aldy. Sol túni Arlan aýla ishinde qýanyshtan árili-berili uzaq shapqylady. Erteńine Arlandy eshkim de kóre almady. «Jaqsy ıt...»
Maqsat QARǴABAI
