Qazaqstan • 06 Aqpan, 2018

«Abý-Dabı Plaza» jumysshylaryna ótemaqy beriledi

271 ret
kórsetildi
3 mın
oqý úshin

Kesheli beri Astanadaǵy «Abý-Dabı Plaza» qurylysynda eńbek daýy órshigeni belgili. Oǵan qurylys alańynda jumys istep jatqan «Qazınjırıng», «Monıtorıng», «EKSPO», «Qazstroı» kompanııalary jumysshylarynyń jumystan qysqarýy sebep bolyp otyr.

«Abý-Dabı Plaza» jumysshylaryna ótemaqy beriledi

Osyǵan oraı Astana qalasynyń prokýratýrasy men ishki ister basqarmasyna jáne «Nur Otan» partııasynyń fılıalyna shaǵymdanǵan qurylysshylar kompanııa jetekshileri ózderin aldap soqqandaryn, zańǵa shorqaqtyǵyn paıdalanyp bir-birden keńsege shaqyryp, jaqynda jumysqa adam alǵanda qaıta shaqyryp alatyndaryn aıtyp, qaǵazǵa qol qoıýlaryn suraǵanyn aıtady. Keıbir kelispegen qurylysshylardy qýdalaıtyndaryn aıtyp qorqytqan da kórinedi. Al qurylysshylar óz kezeginde qystygúni dalada qalǵandaryna jáne qarjylyq ótemaqy almaǵandaryna narazylyq tanytyp, shaǵymdanýǵa májbúr bolǵan.

«Nur Otan» partııasy Tóraǵasynyń birinshi orynbasary Máýlen Áshimbaev atalǵan máseleniń sheshimin qarastyrý partııa nazarynda bolatynyn, qazirgi kezde Astana qalasy ákimdigi jáne prokýratýrasymen osy tarapta birigip jumys istep jatqanyn jetkizdi.

Al Eńbek jáne halyqty áleýmetik qorǵaý mınıstri Tamara Dúısenova osy oqıǵaǵa qatysty túsindirmesinde jergilikti eńbek ınspeksııasynyń jumystan bosatý týraly habarlamany 62 adamnyń alýy tıistigin anyqtaǵanyn aıtady. Buǵan deıin birqatar baspasóz quraldarynda atalǵan qurylys alańynda 400-ge jýyq adamnyń jumystan bosaǵany habarlanǵan bolatyn.

«Eger qosymsha adamdar bolsa, biz aıtamyz. Onda 11 kompannııa jumys isteıdi. Ár kompanııanyń bas merdigermen jasasqan eńbek sharty bar. Onda jumysty qashan aıaqtaıtyny, qurylys alańynan qashan ketetini naqty kórsetilgen», dedi T.Dúısenova.

Mınıstrdiń aıtýynsha, jumystan bosaǵandarǵa ortasha aılyq jalaqy kóleminde ótemaqy tólenedi. «Eńbek kodeksinde naqty kórsetilgen. Eger kásiporynnyń ekonomıkalyq jaǵdaıynyń tómendeýine baılanysty azamattar jappaı jumystan bosasa, olarǵa eki aılyq kólemindegi eńbekaqy beriledi. Eger bul jaǵdaı jumys kóleminiń azaıýyna baılanysty órbise, onda jumys kólemi oryndalǵannan keıingi jumystan bosatý esebinde qaralady jáne ótemaqy retinde aılyq eńbekaqy tólenedi. Ár kásiporyn jumys kúshin tartqan kezde jumys kólemin anyqtaıdy. «Abý-Dabı Plazada» jumys isteıtin tórt uıymnyń da jumys aýqymy anyqtalǵan. Olar negizinen ekinshi deńgeıli jumystardy oryndady. Kelisimshart bekitkende jumystyń qaı ýaqyttan qaı ýaqytqa deıin sozylatyny da tikeleı belgili bolady. Bul da Eńbek kodeksinde jazylǵan. Eger eńbek kelisimsharty belgili bir ýaqytqa belgilense, sol oryndalǵannan keıin keıin jumys sany qysqarady», dedi mınıstr.

Dýman ANASh,
«Egemen Qazaqstan»

Sońǵy jańalyqtar

Denıs Nıkısha kelesi kezeńge óte almady

Olımpıada • Búgin, 16:16