Qazaqstandyq jáne serb kompozıtorlarynyń áýenderi 15 aqpan kúni teatrdyń Úlken zalynda shyrqalady.
Kórermen nazaryna Tiles Qajyǵalıevtyń «Dala ańyzy» sımfonııalyq sıýıtasy usynylady. T. Qajyǵalıevtyń mýzykalyq murasy ulttyq ónerdiń betke ustary ári tyńdaýshylardyń shynaıy qyzyǵýshylyǵyn týdyrary haq. T. Qajyǵalıevtyń shyǵarmalaryn otandyq jáne sheteldik jetekshi ujymdar álemniń eń úzdik sahnalarynda oryndap keledi.
«Astana Opera» mýzykanttarymen birlese Maııa Raıkovıch Belgradta qazaqstandyq kompozıtorlar – A.Jubanov, E.Brýsılovskıı, M.Saǵatovtyń týyndylaryn úlken jetistikpen oryndady. Endi, mine, Qazaqstandaǵy óziniń alǵashqy óner kórsetýinde, pıanıst elordalyq kórermenge serb mýzykasyn usynbaq. Osy keshte Vera Mılankovıchtyń orkestrmen fortepıanoǵa arnalǵan №2 konserti shyrqalady. Kólemdi ári áserge toly týyndy 1995 jyly, burynǵy Iýgoslavııadaǵy azamattyq soǵystyń sońynda jazylǵan edi. Konsert ádiletsizdikte ómir súretin, degenmen móldir mahabbatpen qorǵalǵan serb ártisiniń ishki jan-dúnıesin beıneleıdi. Kompozıtor óz shyǵarmasyn keremet pıanıst, biregeı minezdi qaıratty tulǵa ári óz isine berilgen ustaz – Maııa Raıkovıchke arnaǵan.
«Vera Mılankovıchtyń mýzykasy – jańa sarynnyń djaz elementterimen jáne serb ulttyq áýenderimen toǵysýy. Fortepıanoǵa arnalǵan konserttiń úshinshi bóligi men úshin erekshe qyzyǵýshylyq týdyrdy, onda halyq mýzykasymen qatar L.Bernstaınnyń áıgili «Vestsaıd oqıǵasynan» úzindiler keltirilgen. Bul konsert pıanıst úshin de, orkestr úshin de óte kúrdeli, sondyqtan shyǵarma tyńdaýshylardy shattyqqa bólep, erekshe kúsh-qýat beredi dep úmittenemin», – dedi Maııa Raıkovıch. Konserttiń bastalýy saǵat 19.00-de.
