Konferensııa barysynda Darhan Qydyrəli gazet portaly da sapalyq jáne sandyq ózgeristerge ushyraǵanyn atap ótti. "Derbes redaksııa retinde tirkelgen saıtymyz latyn jáne tóte jazý nusqasymen birge, orys jáne aǵylshyn tilderinde aqparat taratýdy qolǵa aldy. Sondaı-aq halyqaralyq jańalyqtardyń úlesi artty. Aýdıo maqala qosyldy" deı kele Basqarma tóraǵasy jeke server satyp alynyp, QazaqTelekomnyń data ortalyǵyna ornalastyrylǵanyn atap ótti. Sonymen qatar Darhan Qydyrəliniń aıtýynsha, 2010 jyldan beri qoldanystaǵy Wordpress júıesinen bas tartyp, qaýipsizdigi myqty Laravel freımýorki arqyly saıt qaıta jasalyp, Android jáne iOS júıelerine arnalǵan mobıldi qosymshalar iske qosylǵan.
Jıynda belgili bolǵandaı, "Egemen Qazaqstannyń" əleýmettik jelilerdegi paraqshalaryna jazylýshylar sany da bir jyldyń ishinde aıtarlyqtaı artqan. "Feısbýkte «Egemen Qazaqstan» paraqshasyna jazylýshylardyń sany 3 myńnan 13 myńǵa jetti. Tvıtter áleýmettik jelisinde «Egemen Qazaqstan» akkaýntyna verıfıkasııa alyndy" dedi Darhan Qydyrəli. Onyń aıtýynsha, saıtta 2017 jyldyń qańtar aıynan jeltoqsanǵa deıingi aralyqta 6,3 mln. seans bolyp, saıttaǵy gazet materıaldary 12 mıllıon ret oqylǵan. 2016 jylmen salystyrǵanda paıdalanýshylar 320 myńǵa, seans sany 3 mıllıonǵa, oqylǵan maqala sany 6 mıllıonǵa artqan. Sonymen qatar saıttyń aǵylshyn tilindegi nusqasy iske qosylǵaly beri Fransııa, AQSh, Germanııa, Qytaı jáne Túrkııa syndy elderden oqylym kórsetkishi ulǵaıǵan.
Gúlnur Qýanyshbekqyzy,
"Egemen Qazaqstan"
