«Bizdiń mınıstrlik XXIII - qysqy Olımpıada oıyndarynyń kórsetilimin júzege asyratyn quqyqqa ıe kompanııamen kelissózderdi aıaqtady. Olımpıada oıyndaryn aqpannyń 9-y men 25-i aralyǵynda el turǵyndary otandyq arnalardyń tikeleı efırinen tamashalaıdy. Dúnıejúzi nazar aýdaratyn dúbirli dodany «HABAR», «Qazaqstan» men «Qazsport» arnalary tikeleı translıasııalaý quqyǵyna ıe boldy», dedi Aqparat jáne kommýnıkasııalar mınıstri Dáýren Abaev.
Mınıstrdiń sózinshe, «Qazaqstan» men «Qazsport» arnalary 150 tikeleı translıasııaǵa shyǵýdy josparlap otyr. Al, «Habar» arnasy arqyly 208 saǵatty quraıtyn 100 translıasııa efırge shyǵady.
Sonymen qatar, qazaq jáne orys tilderinde Olımpıada kúndeligin kórermen nazaryna usyný josparlanǵan. Demek, Phıonchhanǵa arnaıy barǵan tilshiler toby kúndelikti sońǵy aqparattarymen bólisedi.
«Bizdiń jerlesterimiz 9 sport túri boıynsha saıysqa túsedi. Tolyq aqparatty tómendegi siltemeden alýyńyzǵa bolady. Ońtústik Koreıanyń alańdarynda el namysyn qorǵaıtyn jerlesterimizge tek qana jeńis tileımiz», degen mınıstr sportshylarǵa tilektestigin bildirdi.
Esterińizge sala ketsek, XXIII qysqy Olımpıada oıyndary Ońtústik Koreıanyń Phıonchan qalasynda 2018 jyldyń 9 jáne 25 aqpany aralyǵynda ótedi. Álemniń 95 elinen 2900 sportshy 15 sport túrinen 102 medal jıyntyǵy úshin baq synasady. Qazaqstandyqtar sporttyń 9 túri boıynsha jarystarǵa qatysady. Olar: bıatlon, mánerlep syrǵanaý, konkı tebý, short-trek, taý shańǵysy, shańǵy jarysy, tramplınnen shańǵymen sekirý, frıstaıl akrobatıka, mogýl.
