Qurmanǵazy aýdanynyń ortalyǵy Ganıýshkın aýylynda ótken balyq sharýashylyǵyn damytý máselelerine arnalǵan jınalysqa qatysqan senator Memleket basshysy N.Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» halyqqa Joldaýynda alǵa qoıylǵan mindetterge toqtaldy. S.Eńsegenov balyq sharýashylyǵy salasyn órkendetý týraly oılaryn ortaǵa sala kelip, Parlament qabyldaǵan zańnamalyq aktiler týraly habardar etti. Jınalysqa Atyraý oblysynyń ákimi Nurlan Noǵaev tóraǵalyq etti.
Senator Qurmanǵazy aýdanyna sapary aıasynda Azǵyr polıgony aımaǵynda bolyp, Balqudyq aýylyndaǵy ýchaskelik polısııa ókilderimen de kezdesti. Depýtattyń haty boıynsha Azǵyr óńirinde aýdandyq ishki ister bóliminiń bólimshesi ashylatyn boldy. Ashylyp otyrǵan bólimshege oblys ákimdigi tarapynan ǵımarat berildi. Azǵyr óńirindegi 13 aýyldyq okrýgke qaraıtyn 9 aýyldyń turǵyndary úshin ishki ister bólimshesiniń ashylýy óte mańyzdy bolyp otyr. S.Eńsegenov Eńbekshi aýyldyq okrýgine qarasty Ashaq qumy men Qoshalaq aýylynyń mańyndaǵy aqyn Jumeken Nájimedenovke arnap qoıylǵan eskertkish basynda da boldy.
Senat depýtaty S.Eńsegenov H.Dosmýxamedov atyndaǵy Atyraý memlekettik ýnıversıtetiniń rektory A.Taltenovpen kezdesýde Elbasynyń Joldaýyndaǵy bilim salasyna qatysty mindetter týraly aıta kelip, joǵary bilim berý isin jetildirý, aımaqtyq oqý oryndarynda ǵylymdy damytý jáne «Alash» qaıratkerlerin ardaqtaý máseleleri talqylandy.
