Mınıstr Astana Hub halyqaralyq IT-startaptar tehnoparkin qurý ıdeıasy «Sıfrly Qazaqstan» memlekettik baǵdarlamasy aıasynda qamtylǵanyn, sondaı-aq joba tujyrymdamasy halyqaralyq tájirıbeni zertteý negizinde daıyndalǵanyn atap ótti. «Tehnopark daryndy IT-mamandar úshin jańa tehnologııalyq bastamalar alańyna aınalaryna senimdimiz. Sonymen qatar bul alań ulttyq ınnovasııalyq ekojúıeniń ózegi bolýy tıis. Tehnoparkke otandyq jáne shet memleketterden startaptardy tarta otyryp, sıfrly ekonomıkany qoldaý úshin barlyq jaǵdaıdy jasaýǵa tyrysamyz. Astana Hub-tyń negizgi maqsaty – 2025 jylǵa qaraı jergilikti IT-kompanııalardyń kapıtalyn 1 mlrd AQSh dollaryna jetkizý. Búgin osy akselerasııa baǵdarlamasyn ashý arqyly mańyzdy qadam jasap otyrmyz», dedi D.Abaev.
Al óz kezeginde Astana Hub halyqaralyq IT-startaptar tehnoparkiniń basshysy Maǵjan Mádıev «Garage» jáne «C-Lab» startap-baǵdarlamalarynyń qazirgi nátıjelerimen bólisti. «Atalǵan baǵdarlamalar aıasynda biz ıdeıa jáne prototıp kezeńinde turǵan startap-komandalarmen jumys júrgizemiz. «Garage» preakselerasııalyq baǵdarlamasyna 151 ótinim kelip tústi, olardyń ishindegi 43 joba Demo Day-ge ótkizildi. «C-lab» baǵdarlamasyna 100-den asa ótinim jiberildi. Búgin qatysýshylar alǵash ret korporasııalarmen kezdesip otyr, ári qaraı komandalarmen etene jumys júrgizilip, aqparattyq sessııalar, jeke keńes berýler ótkiziledi, ıdeıany damytyp, onyń prototıpin jasaıtyn bolamyz. Jazda jobalardy testilep, kompanııalardyń bazasynda iske qosqaly otyrmyz», dep atap ótti M.Mádıev.
«Garage» baǵdarlamasy aıasynda komandalar óz startapynyń ıdeıasyn testilep, eń kem degende jumysqa jaraıtyn ónimdi (MVP) jasap shyǵarýǵa, alǵashqy klıentterdi tartyp, óz jobalaryn ınvestorlarǵa tanystyrýǵa múmkindik almaq.
Keshe árbir komanda óz bıznes-jobasyn tanystyrdy, olardyń ishindegi úzdikteri «Garage» startap-ınkýbatoryna qatysý úshin tańdaldy. Osylaısha isin jańadan bastaǵan kásipkerler tájirıbeli tálimgerlerdiń qol astynda jobany basqarý, ónim jasaý jáne marketıng jóninde tegin bilimderdi ıgerýge múmkindik alady. Startap-jobalardy tanystyrýmen qatar, jastar arasynda kásipkerlik mádenıetti damytý jáne otandyq bıznesti halyqaralyq naryqqa shyǵarý taqyrybyna arnalǵan eki paneldik sessııa ótti.
Dınara BITIK,
«Egemen Qazaqstan»
