– Allo, balam, búgin men túngi kezekshiliktemin. Tamaǵyńdy daıyndap qoıdym, keshikpeı qaıt úıge...
– Da, mam...
Baılanys sońǵy sózdi aıtyp úlgergenshe úzilip ketti.
Gúlzııanyń Qalqamandaǵy aýrýhanada hırýrg bolyp qyzmet etkenine biraz jyl. Danııar jalǵyz uly. О́zi asyrap, jetkizip keledi. Bıyl on altyǵa shyqty. Kolledjdiń aqyly bóliminde oqıdy. Kólik áper dep qylqyldaǵaly alty aı boldy. Dostarynyń aldy «Bentlı» minipti.
Qaıda, jalǵyz munyń aqshasy «Toıotaǵa» jetsin be... Hırýrgtiń tabysy jaman emes negizi, ásirese ota jasar aldynda qaltasy qampıyp qalatyny bar.
«...Adamdar da qyzyq qoı, tap ajaldan bul alyp qalatyndaı, mine jany shyǵarda súıretilip keledi de, ımanyna deıin hırýrgtiń alaqanyna ıirip salýǵa shaq. Iá, dáme degen adamdy buza bastaıdy eken. Qazir bólimdegi qyzdar kezekshilikke shyqqanda qansha tapqanyn aıtyp jarysatyndaı jaǵdaıda... О́tkende, Perızatqa kólik apatyna túsken balasynyń jarasyn jýyp bergeni úshin ǵana bir baıshykesh ýystap dollar ustata sapty. Ájethanadan shyqpaı sanaǵan ol paqyr bir jylap, bir kúlipti. Endi, baqandaı 1800 dollardy ustata salsa... Baılar jomart qazir. Ásirese, jaqyndary kólik apatyna ushyraǵanda jandary bezek qaǵady. Sosyn bular da qaltalyny alystan ajyratatyn bolǵan. Áıtpese, qaltaǵa tıyn salmaq túgili, ózińdi tútip jeıtin kedeı-kepshik tolyp jatyr. Bastyqqa shaǵynyp, sotqa beremin dep baıbalam salatynyn qaıtesiń...».
Gúlzııa osyndaı oı jetegimen yrǵatylyp otyrǵanda nómiri 16-avtobýs Qalqamanǵa jetip te qoıdy.
– Gýlıa Ámirjanovna, erte kelgenińiz qandaı jaqsy boldy. Qazir ǵana Momyshulynyń boıynda bolǵan apattan adamdardy alyp keldi. Jedel operasııaǵa kiresiz.
Aǵa medbıke tyzaqtap júr eken. Hırýrgııanyń dálizi polısııaǵa tolyp ketipti. Bas kıimin myjǵylaı bergen podpolkovnık, buǵan qarsy júrdi: «Doktor, bala meniki edi. Jalǵyz ulym ǵoı... Qutqaryńyz, bas súıegi jarylǵan deıdi, qutqaryp qalyńyz. Aıanbaımyn, barym sizdiki, dáriger...». Bul qartań podpolkovnıktiń jalynyshty júzine kúlimsireı qarap júre bergen.
Ne... Qasynan medbıkeler júgire súıretip ótken zembilge nazar aýdarmasa da, keýdesi shym ete tústi. Alqynyp ketkeni nesi?.. «Mynaý kók djınsı shalbardy qaıdan kórip edi. Ketshi, ne kóp, shalbar kóp emes pe?» Myrs etken ol ota bólmesine bettegen.
...Aýyr ota jasaǵany osy shyǵar. Eki saǵat boıy synǵan bas súıekti tazalap, úzilgen qan tamyrdy jalǵap, aqyry jas jigitti qutqardy-aý... Dárigerler bólmesine bettegen ony taǵy da aǵa meıirbıke toqtatty. «Gýlıa Ámirjanovna, mynda taǵy bir aýyr soqqy alǵan bala bar. Esin jımaı jatyr, basynan soqqy alǵan, gematom bolýy kerek. О́ziniń artynan eshkim kelmeı jatyr. Qaraısyz ba?», – dedi shyr-pyry shyǵyp.
– Janym-aý, artynan jaqyndary izdemese biz ne isteı alamyz? Prosedýrany jasaı berińder, kirip shyǵamyn...
Dárigerler bólmesiniń esik aýyzynda muny podpolkovnık kútip tur eken.
– Dáriger...
– Tiri balańyz, alyp qaldyq!
Bul qatqyldaý sóılegen. Anaý ıilip álek...
– Qazir, sý ishýge mursat beresizder me ózi?
Kabınetke kire qol sómkesinen uıaly telfonyn izdegen. 12 ret qońyraý shalynypty. «Toqta, Danııar nege izdedi eken sonsha...».
– Allo, Danko...
– Allo, allo, – Arǵy jaqtaǵy er adamnyń daýsy qulaǵyn jaryp jibere jazdady, – Siz bul telefonnyń ıesine kim bolasyz?
– Men... men mamasymyn!
– Mamasy, sabyr etińiz, men Áýezov aýdandyq jol polısııasynyń qyzmetkeri bolamyn. Sizdiń ulyńyz jol apatyna túsip, Qalqamandaǵy aýrýhanaǵa jóneltildi... Allo, allo...
Sońǵy sózdi estimegen Gúlzııa kabınetten ıtten qashyp shyqqandaı tapyraqtaı jóneldi.
«Báse, báse, kók djınsı shalbar...»
Qalmahanbet MUQAMETQALI,
«Egemen Qazaqstan»
