- Otandyq sporttyń damýyna jetisýlyq sańlaqtar da mol úles qosýda. Jerlesterimizdiń jarqyn jeńisteri kún sanap kóbeıip keledi. Biz de óz tarapymyzdan sport nysandaryna kúrdeli jóndeý jasaýǵa, qurylysyn júrgizýge, materıaldyq-tehnıkalyq bazasyn nyǵaıtýǵa barynsha qoldaý tanytyp kelemiz. Budan bylaı da qoldaý jalǵasyn tabatyn bolady,-dedi aımaq basshysy.
Búginde Almaty oblysynda 3439 sport nysany kelýshilerge esik ashyp otyr.. Ásirese, buqaralyq sportty damytýǵa oraı qoldanysqa berilgen deneshynyqtyrý oryndarynyń sany jyl saıyn artyp keledi. Máselen, ótken jyly Raıymbek aýdanynyń Narynqol aýylynda, Qarasaı aýdanynyń Jalpaqsaı aýylynda fýtbol alańdary salyndy. Qaratal aýdanynyń Úshtóbe qalasyndaǵy sport mektebi, «Jetisý» kásipqoı fýtbol klýby bazasy kúrdeli jóndeýden ótti. Bıylǵy jyly qurylys jumystary byltyr bastalǵan birneshe nysan - Raıymbek aýdanynyń Kegen aýylynda, Talǵar jáne Qaskeleń qalalarynda dene shynyqtyrý-saýyqtyrý keshenderi boı kótermek. Sonymen qatar, Aqsý aýdanynyń Jansúgirov aýylynda jáne Qarasaı aýdanynyń Shamalǵan aýylynda shynyqtyrý-saýyqtyrý keshenderiniń qurylysy josparlanýda eken. Oǵan qosa bıyl Taldyqorǵan qalasyndaǵy sportta daryndy balalarǵa arnalǵan mektep-ınternattyń oqý ǵımaratyn kúrdeli jóndeý jumystary júrgizilmekshi. «Qazan aýzy joǵary...» dege nosy.
Oblys basshysy osy jıynda el qorjynyna upaı salyp, aımaqtyń namysyn túrli jarystarda abyroımen qorǵap júrgen bir top sportshylardy marapattady. 2017 jyldyń úzdik sportshylary bolyp tanylǵan Albert Lınder, Karına Gorıcheva, Demeý Jadyraevtarǵa 700 myń teńgeden syıaqy berilse, dúbirli dodalardyń shańyn qaqqan 28 sportshyǵa 150 myńnan 400 myń teńgege deıingi qarjylaı syıaqynyń sertıfıkaty tabystaldy.
Atap aıtqanda, ótken jyl qorytyndysy boıynsha Albert Lınder, Karına Gorıcheva, Demeý Jadyraev úzdik sportshylar atandy. Sporttaǵy eren eńbekteri úshin olarǵa dıplomdar men árqaısysyna 700 myń teńgeniń sertıfıkaty berildi. Budan ózge 28 sportshynyń jyl ishindegi jetistikteri úshin 150 myńnan 400 myń teńgege deıingi sertıfıkattar usynyldy. Mundaı qurmetten jattyqtyrýshylar quramy da nazardan tys qalǵan joq. Jyldyń úzdik jattyqtyrýshylary bolyp Sergeı Sedov pen Boranbek Qońyratov tanyldy. Al shákirtteri jeńis tuǵyrynan kóringen jıyrmadan astam bapkerdiń de eńbegi atalyp ótildi. Sondaı-aq, oblystaǵy úzdik sport mektepteri de marapattan quralaqan qalmady. Top ishinen Taldyqorǵan qalasyndaǵy № 1 olımpıadalyq rezervtegi mamandandyrylǵan balalar men jasóspirimder sport mektebi maqtaýly dep tanylyp, 500 myń teńge aqshalaı syılyqqa ıe boldy.
Bul jıynda sport taqyrybyna qalam tartyp júrgen jetisýlyq jýrnalısterge de shúlen tıdi. Oblys ákimi bir top tilshi, fototilshi, telejúrgizýshi, beıneoperator men blogerge laıyqty qurmet kórsetti.
Qalmahanbet MUQAMETQALI,
«Egemen Qazaqstan».
Almaty oblysy.
