Máseleniń mán-jaıyn bilmek nıetpen Jańaaýyl aýyldyq okrýginiń ákimi Dáýitbek Nııazbekovke telefon shalǵanymyzda, ol oqıǵanyń Qymyzbaı qystaǵynda oryn alǵanyn, onda Maqsat Baıbazarov esimdi jigit ákesi Dálelbek Baıbazarovpen birge mal baǵyp otyrǵanyn aıtty. Áńgime barysynda aýyl ákimi Tarbaǵataı aýdanynyń Qytaımen shekaralas eldi meken turǵyndaryna myltyqpen uzap shyǵýǵa tyıym salynǵandyǵyn, túz taǵysynyń qystaýlarǵa jıi shabýyldap, malǵa aýyz salýynyń bir sebebi osynda jatqandyǵyn, bul másele, ásirese, baılanysy joq, jol qatynasy nashar shalǵaıdaǵy aýyl turǵyndaryn alańdatyp otyrǵanyn jetkizdi. «Ahmetbulaq shekaraǵa jaqyn ornalasqandyqtan, qystaýlarǵa ruqsat arqyly ǵana shyǵamyz. Ol jaqqa myltyqpen ótkizbeıdi. Ańshylardy jibermeıdi. Qystaýda bir-birinen alshaq ornalasqan 40-qa jýyq qora bar. Qoıshylardyń báriniń qolynda myltyq joq. Sony seze me eken, qasqyrlar da malshylardy basynyp alǵan. Túsinemiz, shekara boıynda saqtalýǵa tıis erejeler men zańdar bar. Alaıda túz taǵysy ereje men zańǵa qaramaıdy ǵoı. Sondyqtan qystaqtaǵy adamdarǵa kómek kórsetilse, ıt-qustan qorǵaný úshin myltyq ustaýǵa ruqsat berilse», deıdi Dáýitbek Nııazbekov. Taratqan málimetterden ańǵarǵanymyz, sońǵy jyldary óńirde qasqyr sany arta túsipti. 2015 jyly olardyń sany 948 bolsa, 2017 jyly 1010-ǵa jetip jyǵylǵan. О́tken jyldyń sońǵy úsh aıynda aýyl turǵyndary 358 qasqyrdyń terisin ótkizipti.
Azamat QASYM,
«Egemen Qazaqstan»
Shyǵys Qazaqstan oblysy
