Bul asa qundy tarıhı qujat Qazaqstan ındýstrııasyn jańa tehnologııalardy engizýdiń kóshbasshysyna aınaldyrý, óndiristik úderisterdi sıfrlandyrý arqyly ónerkásiptegi eńbek ónimdiligin arttyrý, resýrstyq áleýetti tıimdi paıdalaný, óndiriske aqparattyq tehnologııalyq sheshimderdi batyl engizý, agroónerkásip keshenin jańa tehnologııalyq deńgeıge kóterý, kólik pen logıstıkalyq ınfraqurylymdy odan ári damytý mindetterin qamtıdy.
Jurtshylyq kóbine ulttyq bıznes múddesin qorǵaıtyn partııa retinde tanıtyn «Aq jol» partııasynyń ókilderin árıne birinshi kezekte Joldaýdyń bızneske qatysty tustary qyzyqtyrdy. Bızneske qatysty Elbasynyń ustanymdary segizinshi – «Tıimdi memlekettik basqarý» baǵytyndaǵy is-sharalar keshenine engizilipti jáne bul qaǵıdattar naqtylyǵymen erekshelenip, memleket pen bıznestiń araqatynasyn aıqyndap bergen.
«Aq jol» parlamenttik fraksııasy bızneske qatysty máselelerdi Májilis minberinen únemi qozǵap keledi. Aldaǵy ýaqytta da aqjoldyqtar úshin Prezıdenttiń adal básekelestikti, otandyq kásipkerlerdi qoldaýǵa jáne jalpy naryqtyq reformalardy damytýǵa baǵyttalǵan tapsyrmalary basym baǵyt bolyp sanalady.
Joldaýdyń adam kapıtalyna qatysty bólimin oqyǵan kezde densaýlyq pen bilim salasyna Prezıdenttiń jiti kóńil bólgenin baıqadyq. Máselen, Joldaýda naqtylanǵan tapsyrma aıasynda memlekettiń kepildigimen medısınalyq tegin kómekti uıymdastyrýdyń jańa úlgisi josparlanýda. Elbasy azamattarymyzdyń barlyq býyndaryn qamtıtyn bilim berý salasynyń kókjıekterin naqty belgilegen, sondaı-aq bul tarıhı qujat ulttyq sanany jańǵyrtý qaǵıdattaryn odan ári júıeli júrgizýge umtyldyrady. Joldaýda «Ulttyń áleýetin arttyrý úshin mádenıetimiz ben ıdeologııamyzdy odan ári damytýymyz kerek. «Rýhanı jańǵyrýdyń» mán-mańyzy da naq osynda. О́ziniń tarıhyn, tilin, mádenıetin biletin, sondaı-aq zamanyna laıyq, shet tilderin meńgergen, ozyq ári jahandyq kózqarasy bar qazaqstandyq bizdiń qoǵamymyzdyń ıdealyna aınalýǵa tıis», dep aıryqsha atap kórsetilgen, Prezıdent óskeleń urpaqtyń halqymyzdyń, táýelsizdiktiń tarıhyn bilý kerektigin taǵy bir ret qadap turyp aıtyp, eske salǵan.
Byltyr tarıhymyzdyń qasıetti de qaıǵyly, sonymen qosa dańqty bir bólshegi – Alash ult-azattyq qozǵalysynyń 100 jyldyǵy el aýmaǵynda keńinen atap ótildi. Qarasha aıynda Astanada ótken «Rýhanı jańǵyrý Alash jáne azattyq ıdeıasynyń sabaqtastyǵy» atty halyqaralyq ǵylymı-tájirıbelik konferensııasynyń qatysýshylaryna joldaǵan quttyqtaýynda Elbasy Alash qozǵalysynyń sıpatyna «Alash qozǵalysynyń HH ǵasyrdyń basyndaǵy qazaq halqynyń saıası-áleýmettik quqyqtaryn qorǵaý, ulttyq bet-beınesin saqtap qalý jolyndaǵy kúresi, azattyq úshin kúrestiń jarqyn beti bolyp tabylady» dep baǵa berdi. Endeshe, Alash taqyryby mereıtoılyq is-sharalarmen támamdalyp, kún tártibinen túsip qalmaýy tıis. Máselen, bıyl Alashtyń aqıyq aqyny Maǵjan Jumabaevtyń týǵanyna 125 jyl. Osyǵan oraı ótken jyldyń sońynda «Aq jol» partııasynyń parlamenttik fraksııasy depýtattyq saýal joldap, respýblıka kóleminde Maǵjan oqýlaryn ótkizýdi usyndy. Saýalda «Alashtyń maǵynasy onyń bir ǵana júz jyldyǵymen shektelmeıdi. Birtýar tulǵa Maǵjan aqynnyń amanatyn aqtaýymyz úshin Alashtyń 100 jyldyq mereıtoıy Maǵjan oqýlarymen jalǵasyn tapsa degen usynysymyzdy Mádenıet mınıstrligine joldaımyz. Maǵjan oqýlary búkil respýblıka aýmaǵynda ótkizilip, al onyń qorytyndysy Maǵjan Jumabaevtyń týǵan ólkesi Qyzyljar óńirinde jasalǵany jón. Al bolashaqta Maǵjan oqýlary, ataýly datalarda ǵana emes, jyl saıyn turaqty ótkizip tursa nur ústine nur bolar edi» delingen.
Aıta keteıik, bul saýalǵa oń jaýap alyndy. Atalǵan mınıstrlik «Daryn» respýblıkalyq ǵylymı-praktıkalyq ortalyǵymen birlese otyryp, «Maǵjan oqýlaryn» uıymdastyrý boıynsha jergilikti atqarýshy organdarmen jumys júrgizip jatqanyn habarlady. Atap aıtqanda, Alash aqynynyń oqýlary onyń týǵan jeri – Soltústik Qazaqstan oblysynan bastaý alyp, aqynnyń mereıtoıy aıasynda dóńgelek ústelder, shyǵarmashylyq keshter, ǵylymı konferensııalar, kitap kórmeleri uıymdastyrylmaq. Bizdińshe, rýhanı jańǵyrý degenimizge elimizdiń táýelsizdigi úshin kúresken tarıhı tulǵalardyń eńbekteri men ónegeli isterin kópke dáripteý de kiredi.
О́ıtkeni ata-babalarymyz ǵasyrlar boıy ańsaǵan azattyq, táýelsizdik jolynda jandaryn qurban etken Alash arystarynyń esimderi de halyq jadynda saqtalyp, artynda qalǵan muralary týǵan halqynyń júregine jete berýi tıis jáne ony búgingi táýelsiz Qazaqstan jónindegi Elbasymyzdyń oı-tujyrymdarymen sabaqtastyryp nasıhattaýdy kúsheıtip, búgingi zamannyń kádesine jaratý qajet dep sanaımyz.
Sábıt BAIDALY,
«Aq jol» partııasy
Ortalyq keńesiniń hatshysy
