«Syrtqy faktorlardyń turaqsyzdyǵyna qaramastan ótken jyly ekonomıkalyq damýdyń kórsetkishteri oń boldy. Osyǵan baılanysty Úkimet, Ulttyq bank, jergilikti atqarýshy organdardyń nátıjeli jumysyn atap óttim. Qazirgi tańda dúnıejúzindegi ahýal birshama jaqsaryp kele jatqanyn bárimiz bilemiz. Ol bizge óz áserin tıgizedi. Álemdegi damyǵan 30 eldiń qataryna qosylý úshin áli de talaı belsendi jumystar atqarylýy kerek. Qajetti barlyq baǵdarlamalyq qujattar, tıisti zańdar qabyldaý jumystary jalǵaspaq», - dedi Nursultan Nazarbaev.
Elbasy bıylǵy Joldaýynda tórtinshi ónerkásiptik revolıýsııa jaǵdaıynda damýdyń jańa múmkindikteri aıqyndalǵanyn atap ótti. «Onyń tóńireginde jumys isteý bastaldy. Sondyqtan damýdyń qarqynyn údetý kerek. Jaqsy istelgen nárseniń barlyǵy «qaltamyzda». Oǵan rahmet aıtamyz. Al endi istelmegen jumystarǵa, alda atqarylatyn jumystarǵa, kemshilikterge kóńil bólý kerek. Baǵdarlamalardy sapaly túrde iske asyrý, olarǵa bólinip jatqan qarjylardy tıimdi paıdalaný osy otyrǵan barlyq azamattardyń mindeti bolyp sanalady», - dedi Memleket basshysy.
Sonymen qatar Qazaqstan Prezıdenti qabyldanǵan barlyq baǵdarlamalardy, bıylǵy Joldaýda qoıylǵan mindetterdi oryndaý Úkimettiń aldynda turǵan basty mindet ekendigin basa aıtty. «Sharýa az emes. Kúndelikti jasalyp jatqan jumys ta jeterlik. Biraq, bul baǵdarlamalarǵa barlyqtaryńyz kóńil bólip otyrýlaryńyz kerek. Bul bizdiń jalpy maqsatymyzdy oryndaýǵa septigin tıgizedi», - dedi Elbasy.
Sondaı-aq Prezıdent elimizdegi barlyq arnaıy ekonomıkalyq aımaqtardyń (AEA) jumystaryna tekserý júrgiziletinin aıtty.
«Bıýdjettiń mol qarajaty arnaıy ekonomıkalyq aımaqtardy qurýǵa jumsalýda. Qazirgi ýaqytta bizde 11-i bar, 283 mlrd teńge bólindi. Oblys ákimderi jańa AEA qurý ótinishterimen bizdi qaǵazdyń astynda qaldyrýdy jalǵastyrýda. Úkimet atalǵan 11 AEA-ǵa synı kózben qarasyn, olar ne berdi? Mán-jaıdy anyqtamaıynsha eshqandaı AEA qurylmasyn», - dedi Nursultan Nazarbaev.
Osy rette Elbasy elimiz ekonomıkasyndaǵy óńdeý ónerkásibiniń úlesin arttyrý qajettigine nazar aýdartty. «Biz jyl saıyn ondaǵan jańa óndiristi iske qosyp, jańa jumys oryndaryn quramyz. Indýstrııalandyrý jyldary ishinde óńdeý sektory 36 prosentke ósti. Bul jetistik, shıkizattyq resýrstardan balama qurýǵa tyrysýdamyz. Buǵan qosa, ekonomıkadaǵy óńdeý ónerkásibiniń úlesi ósken joq. 11 prosent bolǵan. Sol kúıinde qalyp otyr», - dedi Nursultan Nazarbaev. Memleket basshysy bul jaıt shıkizattyń ekonomıkamen qatar ósýimen túsindiriletindigin atap ótti. «Biraq, mundaı túsindirý qabyldanbaıdy. Ekonomıkanyń jalpy kólemi ósýi tıis. Bizge aldyńǵy qatarly tehnologııa berip, eksporttyq ónim shyǵaratyndarǵa memlekettik qoldaý kórsetýimiz qajet», - dedi Qazaqstan Prezıdenti.
