«Medısınalyq mekemelerde aqparattyq júıelerdi engizýdiń eń tómen kórsetkishi - 21 prosent Shyǵys Qazaqstanda tirkelgen. Danıal (oblys ákimi - avt.), tur, tez tur dedim. Aqtóbede oblysynda - 37 prosent, Astanada 31 prosent eken. Báriń turyńdar!», - dedi N.Nazarbaev. Osydan keıin ákimder kezek-kezek esep berdi. Shyǵys Qazaqstan oblysynyń ákimi Danıal Ahmetovtiń aıtýynsha, aımaqta medısınalyq mekemelerdi kompıýterler jáne basqa tehnıkamen qamtamasyz etýge 1 mlrd teńge bólingen bolatyn.
«Alaıda barlyq tehnıkany qarjy mınıstrliginiń satyp alýlar komıteti satyp alady», - dedi D. Ahmetov. Degenmen, QR Qarjy mınıstri Baqyt Sultanov onyń sózin joqqa shyǵardy. «Nursultan Ábishuly, biz tek satyp alýlar alańyn ǵana usynamyz. Komıssııalardyń barlyǵy óńirde otyrady. Bárin solar sheshedi. Ondaıda bizge silteı salady. Ol durys emes», - dep atap kórsetti B.Sultanov. Al Aqtóbe oblysynyń ákimi Berdibek Saparbaev kompıýterdi satyp alýǵa aqshany tolyǵymen bólgenin jetkizdi.
Astana ákimi Áset Isekeshev te aldaǵy ýaqytta ózine júktelgen mindetterdi oryndaýǵa ýáde etti. «Bul - halyqtyń densaýlyǵy. Usaq-túıek nárse emes. Mınıstrlik barlyq jumysty úılestirýi tıis. Ákimder júktelgen tapsyrmany oryndaýy qajet. Isteı almasańdar, aıtyńdar! Jumysty atqarýǵa ne kedergi? Bul - asa ózekti másele, ony tezdetip sheshý kerek», - dep atap kórsetti N.Nazarbaev. Budan bólek, Memeleket basshysy Soltústik Qazaqstan, Qostanaı men Aqmola oblystarynyń ákimderin turǵyzyp, bir silkilep aldy. Sebebi atalǵan aımaqtarda medısınalyq mekemelerdi ınternetpen qamtý kórsetkishi tómen bolyp tur. QR Densaýlyq mınıstri Eljan Birtanovtyń aıtýynsha, aǵymdaǵy jyly maýsym aıynan bastap densaýlyqtyń elektrondy tólqujaty pılottyq rejimde engiziledi.
«Eger jyldyń aıaǵyna deıin barlyq aımaqtar aqparattyq júıelerin retke keltirse, kelesi jyldan bastap densaýlyq salasynyń basym bóligi elektrondy rejimde jumys isteıtin bolady», - deıdi E.Birtanov.
