Arnaıy salynǵan bes buryshty stadıondaǵy sherýde álemniń 92 eliniń sportshylary kezek boıynsha júrip keledi. Aıta keterligi, bes qurlyqtaǵy halyqtyń ókilderi úshin salynǵan stadıonǵa 35 myń adam sııady eken. Qysqy Olımpıadanyń ashylý saltanatynda uıymdastyrýshylar tabıǵat pen adamzattyń úılesimin kórkem kórinis arqyly kórsete bildi.
Sportshylardyń sherýin Grekııa quramasy bastady. Grekııa eki sport túrinen tórt qana sportshy ákelgen. Olardyń izimen qar jaýmasa da qysqy Olımpıadaǵa kelip otyrǵan qar jaýmaıtyn Gana eliniń bir ǵana sportshysy sherýdi jalǵastyrdy. Odan keıin Nıgerııa, Nıderlandy jáne taǵy basqa elderdiń sport sańlaqtary sherýde júrip ótti.
Kóp keshikpeı Qazaqstannyń namysyn qorǵaıtyn sportshylar sherýden kórindi. Halyqaralyq dárejedegi sport sheberi, short-trekshi Abzal Ájiǵalıev Qazaqstannyń kók týyn kókke jelbiretti. Qazaqstandyq delegasııanyń aıbyny asqaq, rýhy basym. Stadıonda sonymen birge, kórermenniń qoshemetine ıe bolǵan 46 sportshymyz úshin taqym qysyp otyrǵan qazaqstandyq jankúıerler de kórindi.
Aıta ketsek, osydan az ǵana ýaqyt buryn Ońtústik Koreıanyń Phenchhan qalasynda HHIII qysqy Olımpıada oıyndary resmı túrde ashylǵan bolatyn. Jalpy Olımpıadaǵa Qazaqstan sportshylary 57 joldama jeńip alǵan edi. Olar sporttyń 9 túrinen synǵa túsedi. Olımpıadada jalpy 15 sport túrinen 102 medal jıyntyǵy sarapqa salynady. Atap aıtqanda, bıatlonnan - 11, bobsleıden - 3, skeletonnan - 2, kıorlıngten - 3, konkımen júgirýden - 14, mánerlep syrǵanaý - 5, short-trek - 8, taý shańǵysy - 11, shańǵy qossaıysynan - 3, shańǵy jarysy - 12, shańǵymen tramplınnen sekirýden - 4, frıstaıl - 10, snoýbord - 10, shana sporty - 4, shaıbaly hokkeıden - 2 medal oınatylady. Aıta keterligi, Qysqy Olımpıada oıyndary 1924 jyldan beri ótkizilip keledi. HHIII qysqy Olımpıada oıyndaryna bul joly 92 memlekettiń sportshylary qatysady. Bul qysqy Olımpıada tarıhyndaǵy qatysýshy elder boıynsha rekord bolyp otyr.
