Taraptar saıasat, saýda-ekonomıka, kólik jáne ındýstrııa-ınnovasııa salalaryndaǵy ózara yntymaqtastyq máselelerin talqylady.
«Ekijaqty qatynastar salasynda osy jyl mańyzdy oqıǵalar men sharalarǵa toly bolyp otyr. Koreıa Respýblıkasy Prezıdentiniń Mýn Chje Inniń bıylǵy mamyr sońyndaǵy Qazaqstanǵa sapary negizgi oqıǵa bolýy tıis», - dedi senator. G.Kım Prezıdent N.Nazarbaevtyń 2016 jylǵy 9-11 qarashadaǵy Seýlge memlekettik sapary barysynda qol qoıylǵan Stretegııalyq áriptestik qatynastardy odan ári tereńdetý týraly birlesken deklarasııanyń zor mańyzyn atap ótti.
Júzdesýshiler ekijaqty aýqymdy baılanystardy nyǵaıtý úshin parlamentaralyq ózara is-qımyldyń erekshe mańyzy týraly ortaq pikir bildirdi. Depýtattyq dostyq toptary júıesi boıynsha parlamentaralyq baılanystardy damytý týraly kelisimge qol jetkizildi, Qazaqstan Parlamenti Senatynyń Tóraǵasy Qasym-Jomart Toqaevtyń Ońtústik Koreıa Ulttyq Assambleıasynyń basshysyna bıyl resmı saparmen Astanaǵa kelýge shaqyrýy tabys etildi. G.Kım elimizdiń ınvestısııalyq zańnamasymen jáne ekonomıkalyq josparlarymen tanystyryp, Qazaqstandaǵy jobalardy iske asyrý jónindegi birlesken jumystarǵa koreı bıznesin shaqyrdy. Senatordyń pikirinshe, aýyl sharýashylyǵy, týrızm, kólik-logıstıka jáne joǵary tehnologııalar salalaryndaǵy yntymaqtastyq yqylas týǵyzady. Koreı túbegindegi jaǵdaıdy retteý taqyrybyn talqylaý barysynda G.Kım BUU Qaýipsizdik Keńesiniń Tóraǵasy retinde Qazaqstannyń 2018 jyly qańtarda qabyldaǵan mańyzdy sharalaryn atap ótti. Ol BUU Qaýipsizdiń Keńesiniń 18 qańtardaǵy Prezıdent N.Nazarbaev pen Polsha Prezıdenti A.Dýda qatysqan «Jappaı qyryp-joıý qarýlaryn taratpaý: senim sharalary» taqyryptyq brıfıngin atap ótip, onyń qorytyndysy boıynsha Qaýipsizdik Keńesi Tóraǵasynyń aımaqtyq qaqtyǵystardy boldyrmaý jáne aldyn alý dıplomatııasy týraly málimdemesi qabyldanǵanyn aıtty. Qazaqstan Respýblıkasy únqatysý qalyptasatynyna jáne Phenchhandaǵy oıyndarǵa KHDR-dyń qatynasatynyna, Koreı túbegindegi shıelenistiń sheshimi tabylatynyna senim artady, dedi G.Kım.
Taraptar kezdesý sońynda talqylanyp otyrǵan máseleler boıynsha kózqarastardyń uqsastyǵyna toqtala kelip, halyqaralyq arenadaǵy yntymaqtastyqty jalǵastyrýdy jaqtaıtynyn aıtty.
