Ol fınaldyq básekeniń alǵashqy kezeńinde 75,10 upaımen jetinshi orynnan kórindi. Ekinshi fınaldyq kezeńde 76,81 upaımen úzdik altylyqqa kirip, medal úshin synǵa túsetin sportshylardyń qataryna endi.
Al sońǵy fınaldyq saıysty Galysheva birinshi bolyp bastap, 77.40 upaı jınady. Bul nátıje onyń qola júldeni ıelenýine jetkilikti boldy. Kúmis júlde Sochı Olımpıadasynyń jeńimpazy kanadalyq Jıýstın Dıýfýr-Lapýantqa (78,56) buıyrsa, fransııalyq Perrın Laffon (78,65) Phenchhan Olımpıadasynyń chempıony atandy.
Aıta keteıik, bul Iýlııa Galyshevanyń úshinshi Olımpıadasy. Ol buǵan deıin Vankýver Olımpıadasynda 11-shi, Sochı Olımpıadasynda jetinshi oryn ıelengen edi.
Galyshevamen qatar bul synǵa 16 jastaǵy otandasymyz Aıaýlym Ámirenova da qatysqan bolatyn. О́kinishke qaraı, Aıaýlym ekinshi irikteý kezeńinde tómen upaı jınap, irikteýden óte almady.
