Búginde qurylys kompanııalary «Qaraǵaıly» shaǵyn aýdanynda turǵyn úı baǵdarlamasy aıasynda salynǵan alǵashqy kóp páterli 9 qabatty úılerdi qoldanysqa berýde. Qurylystyń negizgi merdigerleri bolyp Semeıdiń eki iri kompanııasy belgilengen. Qazirgi ýaqytta kirpish qalaý jáne terezelerdi ornatý jumystary 100 paıyz aıaqtalyp, tek úıdiń ishki árleý jumystary júrgizilip jatyr.
Sonymen qatar qalada memleket-jekemenshik seriktestigi aıasynda «Fırma Azııa» JShS 320 oryndyq balabaqsha salyp jatyr. Nysandy qoldanysqa berý merzimi osy jyldyń sońyna belgilengen. Qazirgi ýaqytta bul jerde mektepke deıingi tárbıe oshaǵynyń irgetasy quıylyp, qabyrǵalary qalanýda.
Aımaq basshysynyń qatysýymen «Fırma Azııa» JShS bolashaqta boı kóteretin «Abaı-Arena» biregeı kesheniniń qurylys jumystaryn bastap ketti. Biregeı ǵımarattyń qurylys jumystaryna birneshe iri seriktester men otandyq mamandardy shaqyrtý kózdelip otyr. Oblys ákiminiń aıtýynsha, bul aýdanda kópqabatty birneshe turǵyn úı salý josparlanǵan. Eńseli turǵyn úıler atshaptyrym aýmaqty alatyn «Abaı-Arena» keshenin jan-jaǵynan qorshap turatyn bolady.
– Qandaı ádemi shaǵyn aýdan. Taǵy da birneshe turǵyn úı boı kóterýi kerek. Olar «Abaı-Arena» keshenin jan-jaǵynan qorshap tursa úılesimdi kórinedi. Shamamen ol úıler 12 qabat bolsa jáne túsin ashyq tústen tańdasańyzdar. Bul shaǵyn aýdannyń turǵyndaryna, jalpy qalanyń halqyna kóterińki kóńil-kúı syılaıdy, – dedi oblys ákimi Danıal Ahmetov.
Sonymen qatar shaǵyn aýdanda turǵyndarǵa jaıly bolýy úshin keń joldar tóselip, jaıaý júrginshiler aımaǵy men avtoturaq qarastyrylǵan. Aıta keteıik, qurylys jumystary barysynda shaǵyn aýdanda qurylysshylar qalashyǵy salynbaq. Jataqhana men kúnine tórt ret tamaq beretin 200 orynǵa shaqtalǵan ashana da bolady. Odan basqa qurylys jumystaryna jumyldyrylatyn kompanııalar men seriktesterdiń ókilderi jumys isteıtin jeke keńse de josparlanǵan.
Raýshan NUǴMANBEK,
jýrnalıst
SEMEI
