Kómekeı áýlıeniń mereıtoıyn óz deńgeıinde atap ótý sharalaryna oblys ákimi Erlan Qoshanov erekshe mán berip otyr. Búginge deıin óńir basshysy osy sharýanyń jaı-japsaryn pysyqtaǵan eki jıyn ótkizdi. Qazirgi ýaqytta naqty qolǵa alynatyn jospar-jobalardyń sulbasy aıqyndalyp, resmı túrde bekitilýdiń az aldynda tur. Sonyń biri – áıgili jyraýdyń kesenesin janyndaǵy murajaı úıimen qosyp jóndeýden ótkizý. Bul maqsatqa oblystyq bıýdjetten 70 mıllıon teńge bólinbekshi.
Bul baǵytta Buqar jyraýdyń esimin ıemdengen aýdannyń basshylyǵy da qarap otyrǵan joq. Jalpy halyqqa ortaq tulǵanyń toıyna degen ázirlik jan-jaqty júrgizilýde. Aýdan úshin bul úlken syn ekendigi túsinikti. Sonymen qatar mereıtoıǵa daıyndyq sharalary aıasynda basqa da ótkir turǵan birqatar máseleniń túıinin ońynan sheship alý buqarjyraýlyqtar úshin úlken olja bolmaq.
Buqar jyraý aýdanynyń ákimi Shagýrashıd Mamalınovtiń aıtýynsha, turǵyndardy ortalyqtandyrylǵan sapaly sýmen qamtamasyz etý jumystary jalǵasyn tabady. Aldaǵy eki jylda toǵyz eldi mekenniń aýmaǵynda geologııalyq barlaý jumystaryn júrgizýdiń jobalyq-smetalyq qujattamasy jasalmaq. Jaqynda Qarajar, Botaqara, Asyl, Jańatalap, Sheshenqara, Trýdovoe, Qyzyljar, Jańaqala, Doskeı, Samarqan eldi mekenderinde sý qubyrlary jelisin ornatý men qaıta isteýdiń jobalyq-smetalyq qujattamasyn jasaý qolǵa alyndy.
Doskeı aýylynda káriz júıeleriniń 95 paıyzy ábden tozǵan. Olardy jańartý jáne qaıta qurastyrý jumystary jaqyn aılardyń josparyna engizilip otyr. Sonymen qatar Ǵ.Mustafın kentiniń káriz júıelerin qaıta qurastyrý men Sarytóbe, Baıqadam, Úshtóbe aýyldarynda sý qubyrlaryn tartýǵa da aýdandyq bıýdjetten qarjy bólindi.
Aǵymdaǵy jyly aýdanda energııa únemdeý men energııa tıimdiligin arttyrý boıynsha jumystar da jalǵasa beredi.
– Qazir biz qaldyqsyz jumys isteıtin alǵashqy qoqys óńdeý zaýytyn iske qosýǵa ázirlik ústindemiz, – deıdi aýdan ákimi. – «JanArý» JShS-ne tórt gektar jer berildi. Aıyna segiz myń tonna qoqys óńdeı alatyn zaýyt qarasha aıynda iske qosylady. Qoqys presteri ornatylyp, aýyldardan qatty turmys qaldyqtaryn jınaý men suryptaý pýnktterin ashamyz.
Buqar jyraý aýdanynda halyqqa medısınalyq kómek kórsetýdiń qoljetimdiligi men sapasyn arttyrýǵa erekshe den qoıylǵan. Dıspanserlik esepte turǵan jandardy tegin dári-dármekpen qamtamasyz etý maqsatyna 39 mln teńge bólindi. Aýdanda úsh áleýmettik dárihana jumys isteıdi.
Bilim berý júıesin damytý men jetildirý jumystarynda da damyl joq. Aǵymdaǵy jyly «Kókpekti» aýylynda jekemenshik balabaqsha ashyldy. «Bilim berý robot tehnıkalary» jobasynyń aıasynda jumystar atqarylýda. Qyzyljar aýylyndaǵy orta mektepte kúrdeli jóndeý jumystary aıaqtalýǵa jaqyn.
Aýdanda áleýmettik turaqtylyq pen halyqtyń turmys deńgeıin kóterýdi qamtamasyz etýge erekshe kóńil bólinedi. Mańyzdy kórsetkishterdiń biri – jumyssyzdyqty azaıtý. Jumyssyz retinde resmı tirkelgender sany qazir 110 adam, ıaǵnı jumysqa qabiletti halyqtyń 4 paıyzy.
Aýdan halqynyń dene shynyqtyrý jáne sportpen shuǵyldanatyn bóliginiń úlesin bıyl 29,9 paıyzǵa deıin jetkizý kózdelip otyr. Osy maqsatta Qýshoqy kentinde balalar men jasóspirimderdiń sport klýby ashylmaq.
Buqar jyraý aýdany uly jyraýdyń mereıtoıyna laıyqty ázirlenýde.
Qaırat ÁBILDA,
«Egemen Qazaqstan»
Qaraǵandy oblysy,
Buqar jyraý aýdany
