Qaırat Nurtas aýyr dertke shaldyqqan kishkentaı qyzben jolyqty

Atalmysh ortalyqta Alladan saýyǵyp ketýin tilegen kishkentaı taǵdyrlar kezegimen em qabyldap jatyr. Olardyń ómir súrýge de­gen essiz qushtarlyǵy men ar­man-murattary kóp-aq. Osynda emdelip jatqan Aıdananyń bir tilegi óziniń súıikti ánshisi Qaırat Nurtaspen kózbe-kóz júzdesip, tildesý bolǵan. Apta sońynda án­shi aýyr dertke shaldyqqan Aıda­­nanyń ótinishimen Pedıatrııa or­ta­lyǵyna kelip, halin bildi. 

Jaqynda ǵana otadan shyqqan Aıdana úshin bul esten ketpes­teı qýanysh bolǵany aıtpasa da túsinikti. О́nerin baǵalaıtyn jasóspirim tilekshisimen tanysqan ánshi Aıdananyń ǵana emes, barsha onkogematologııa bólimindegi balalardyń kóńilin aýlap, tez saýyǵyp ketýlerin tiledi. 

Dárigerler kishkentaı qyzdyń bir aýyz tilegin oryndaǵan aq jú­rek­ti ánshige de, kezdesýdi uıym­dastyrýǵa muryndyq bolǵan «Amıla» qoryna da dán rıza. Naý­­­­qas balalardyń biryńǵaı kún­de­­rine shýaq shashqan ánshiniń bul kel­geniniń ózi de shıpa. 

Osylaısha «Amıla» onkolo­gııalyq syrqat balalarǵa kómek kórsetetin qoǵamdyq qorynyń bas­qa da saýapty tirlikteri jal­ǵa­syn tabýda. Qor «Shuǵyl qajet­tilik­ter» jobasy aıasynda naý­qas balalarǵa jórgekten bastap, ke­rek-jaraqtaryn túgendep turady. 

Qaırat Nurtas kelgennen  keıin «Amıla» qoǵamdyq qory taǵy bir jaqsy iske muryndyq bolyp, anasynyń ótinishimen aq qan aýrýyna shaldyqqan ulynyń armanyn oryndady.

Azattyń armany Búrkit esimdi laqap atymen tanymal qazaq estradasynyń belgili ánshisi Aıbek Seıitovpen júzdesý edi. 
«Ortalyqta jatqanymyzǵa uzaq ýaqyt boldy. Eki aptadan beri ulymnyń ystyǵy túspeı qoıdy. Kóńili de baıaǵydaı emes, un­jyrǵasy túsip, syrqatpen kúres­kisi kelmeıtindeı kórindi. Bala­synyń mundaı halin kórý árbir ana úshin aýyr. Ne istesem bolady? Qalaı kóńil kótersem eken dep ýaıymdadym. Balam Búrkitti janyndaı jaqsy kóredi. О́zi de mýzykaǵa jaqyn, óleń jazady, gıtarada oınaıdy. Jaqsy kóretin ánshisin shaqyryp, tosyn syı jasap, qýantsam, bir ózgeris bolar degen úmitpen «Amıla» qo­ryna habarlasqan edim. Kezdesýdi uıymdastyryp bergen qor erik­tilerine, ótinishimdi jerge qal­dyrmaı kelgen Búrkitke al­ǵysym sheksiz. Senesiz be, balama bul jańalyqty aıtqan kúni ys­tyǵy túsip, beti beri qarap, em qo­na bastady. Bul júzdesý balama kúsh-qýat, rýh beretinine sene­min», dedi Azattyń anasy Halıma Ájiǵulova. 

Al kezdesý jóninde ánshi ınstagramdaǵy paraqshasynda: «...Ǵalamtor júıesinen volon­ter­lardyń kómegimen Azattyń anasy maǵan shyǵyp, ulynyń meni qatty kórgisi kelgenin jetkizdi. Bir kún ótkizbeı, jaýap qaıtardym. Sóıtip búgin @tumartime kom­panııasynyń ádemi bir erler saǵa­tyn alyp, emxanaǵa jóneldim! Esiktiń aýyzynda Azattyń anasy qarsy aldy. Kózinen jas kórindi. Birden maǵan: «Kelgenińizge rax­met!» dedi. Men de ol kisige «Oqa­sy joq! Men úshin bul túkke tur­­maıdy!» dedim. Qysqasy, Azat­­tyń palatasyna kirip, tany­syp, qal-jaǵdaıyn surap, biraz áńgimelestim. О́zi ónerli jigit­ter­diń biri eken. Mýzyka ja­zady, beınekórinister túsiredi, án de aıtady. О́kinishtisi, osyndaı aýrýǵa shaldyǵyp qalypty. Eń bas­tysy, bul em qonatyn dert eken. Biraq tez jazyla salatyn dert emes. Sondyqtan dostar Azatqa bar jaqsylyqty tileıik, emdelip ketsin! Duǵalaryńyzdy oqyńyzdar!» dep jazady.

Aınash ESALI,
«Egemen Qazaqstan»
ALMATY