О́tken beısenbide Rýmynııa prezıdenti Traıan Beseský eldiń qorǵanys jónindegi joǵarǵy keńesi óz aýmaǵynda AQSh-tyń zymyranǵa qarsy qorǵanys (ZQQ) qondyrǵylaryn ornalastyrý jónindegi usynysyn qabyldaǵanyn jarııalady. AQSh memlekettik hatshysynyń kómekshisi Fılıpp Kroýlıdiń aıtýynsha, atalmysh qondyrǵylar Qara teńiz akvatorııasynda da ornalastyrylýy múmkin. Onyń túsindirýinshe, olar Reseıge emes, Iranǵa qarsy baǵyttalmaq.
GES-TI HALYQ QARJYSYNA SALMAQ
Tájikstanda salynyp jatqan Rogýn sý elektr stansasy halyqtan jınaǵan aqshamen qarjylandyrmaq bolyp otyr. Qańtardyń basynda bastalǵan sharaǵa baılanysty bir aıǵa jýyq merzimde halyqqa 700 mıllıon samanı, ıaǵnı 160 mıllıon dollardaı GES aksııasy satylypty. Osynaý GES salynyp bitse, bul el elektr energııasy tapshylyǵynan birjola qutylmaq. Qurylys keshegi KSRO kezinde bastalyp, aıaqsyz qalǵan. Jaqynda ony salýǵa Reseı de ýáde berip edi, olar da taıqyp ketti. El basshylyǵy endi halyqqa qol jaıyp otyr. Biraq sol halyqta da kúı joq. Talaı tájik azamattary kúnkóristiń qamymen shetel asyp ketken. Olardan qarjy suraý da qıyn. Basqadaı amal qalmaǵan soń úkimet soǵan baryp otyr.
BURYNǴYNY QAZIRGISI KINÁLAIDY
Slovakııanyń premer-mınıstri jáne “Baǵyt sosıal-demokratııa” partııanyń kósemi Robert Fıso ózinen burynǵy premer “Demokratııalyq partııanyń” kósemi Mıkýlasha Dzýrındany jemqorlyqpen aınalysty dep aıyptady. Aıyptaǵanda, qylmystarynyń túrin tústep, naqty faktilerdi keltiredi. Al Dzýrında óz atyna aıtylǵan aıyptardy moıyndamaǵanmen, aldaǵy parlament saılaýyna qatyspaıtynyn málimdedi. Ras, ony aıyptaýdan qoryqqandyqtan emes, saılaý naýqany kezinde óz partııasyn jamandaýǵa jol bermes úshin dep túsindirdi.
ShEIITTERDIŃ JOLYNDA ShEIIT BOLǴAN
Irak astanasynyń shet jaǵynda Kerbala qalasyna qaraı Muhammed paıǵambardyń nemeresi Hýseınniń árýaǵyna minájat etýge bara jatqandardyń mańynda jasalǵan lańkestik áreketten 54 adam qaza taýyp, 120 adam jaraqat alypty. Ádette Hýseınniń ólimine arnalǵan 40 kúndik aza tutýdan keıin Arbaın merekesi ótedi. Bıyl bul mereke 15 aqpanda bolmaq. Ol sharaǵa qarsylar da bar. Lańkestik áreket – sonyń bir kórinisi. Mereke kezinde Kerbalada jurt tynyshtyǵyn 25 myń quqyq qorǵaý qyzmetkerleri kúzetpek.
NÁPAQASYN SYRTTAN IZDEIDI
Shetel aqparat quraldarynyń habarlaýyna qaraǵanda, Qyrǵyz Respýblıkasynda 800 myńdaı adam jumys izdep shet elderge ketken kórinedi. Halqy az qyrǵyz eli úshin bul tym kóp. Burnaǵy jyly qyrǵyz mıgranttary týǵan eline 1,2 mıllıard dollar qarjy aýdarypty. Bul Qyrǵyzstannyń ishki jalpy óniminiń 27 paıyzyn quraıdy eken. Soǵan qaraǵanda, elde qalǵandardyń óndirgen ónimi de, tapqan tabysy da mardymsyz ekenin ańǵarý qıyn emes. Árıne, elde jaǵdaı jaqsy bolsa, eshkim de syrttan nápaqa izdemeıtini belgili.
JÚGERIDEN JÚREK AINIDY
Bir tamaqty kúnde jeı berse, adam odan shyǵady. Al juǵymsyzdaý tamaq odan da jaman. KHDR-da adamdardyń negizgi tamaǵy júgeri bolyp otyr. Muny el kósemi Kım Chen Irdiń ózi moıyndap, aldaǵy ýaqytta ony bıdaı jáne kúrishpen almastyrýdy josparlap otyrǵandaryn eldiń bas basylymy “Rodong Sınmýn” habarlady. Kóp jerde túsimi mol júgeri – malǵa jem-azyq. Ony basqa daqylmen almastyrý da ońaı bola qoımas. Onsyz da bul eldiń halqy azyq-túlik jetimsizdiginen kóp qınalyp, shetten kómek suraıdy.
PIKASSONYŃ BIR SÝRETI – 13 MILLION DOLLAR
Londonda ótken ımpressıonıster men modernısterdiń shyǵarmalary aýksıonynda Pablo Pıkassonyń jáne onyń jolyn qýýshylardyń kartınalaryna suranys kúshti boldy. Pıkassonyń kezdeısoq kórse keı adamnyń úreıin ushyratyndaı “Áıeldiń basy (Jaklın)” kartınasy 13 mıllıon dollarǵa baǵalanǵan. Alǵashqy usynys baǵasy 5-6 mıllıondaı eken. Golland sýretshisi Kesa van Dongenniń 1910-1911 jyldarda jazǵan “Syǵan qyzy” kartınasy 11 mıllıon 284 myń dollarǵa baǵalanypty.
Ázirlegen Mamadııar JAQYP.
