«Astana Opera» teatry Almaty qalasyna gastrolmen bardy

Gastrol «Rýhanı jańǵyrý» baǵdarlamasy aıasynda Mádenıet jáne sport mınıstrliginiń qoldaýymen uıymdastyryldy. Týr qazaq mýzykalyq óneriniń áıgili týyndysy – A.Jubanov pen L.Hamıdıdiń «Abaı» ulttyq klassıkalyq operasymen bastaldy.  

Qoıylymdar Qazaqstannyń jáne Italııanyń aıtýly óner qaıratkerleriniń qatysýymen sahnalanǵan. Alǵashqy spektaklge mýzykalyq jetekshi ári dırıjeri bolǵan Qazaqstannyń eńbek sińirgen qaıratkeri, Alan Bóribaev. Qoıýshy rejısser – ta­nymal ıtalııalyq rejısser Djankarlo del Monako. Muhtar Áýezovtiń lıbretto je­lisi boıynsha jasalǵan uly jaýhar shyn máninde shyrqaý shabyttyń shynaı jemisi boldy.

– Bul gastrol biz úshin asa m­ańyzdy ári jaýapty, se­bebi, birinshi kezekte, ózi­miz­ge ja­qyn qazaqstandyq kórer­men­dermen qaýyshamyz. Trýp­pa­myz­dyń kópshilik ártisi ózde­riniń ustazdarynyń aldyna shy­ǵyp, ónerin kórsetedi, al olar shákirtteriniń kásibı sheberligine baǵasyn bermek. Biz úshin bul kezekti emtıhan. Tutastaı al­ǵanda, trýppaǵa gastroldik sa­parlar, ózara tájirıbe alma­sý qajet. Almatylyqtar úshin «Abaı» operasyn beker tań­da­ǵan joqpyz, bul týyndy ult­tyq ónerimizdiń betke ustar jaýharyna aınaldy. Osy operany oryndaý arqyly biz Abaı atyn­daǵy opera jáne balet teatry­na degen qurmetimizdi bildi­remiz, – dep atap ótti «Asta­na Opera» teatrynyń dırektory Ǵalym Ahmedıarov.

Onyń erteńine gastroldik baǵdarlamany sátti jalǵaǵan HH ǵasyrdyń ataqty horeografy Kennet Makmıllannyń «Manon» baleti boldy. Balet týyndysy abbat Prevonyń «Kavaler de Grıe men Ma­non Leskonyń oqıǵasy» roma­nynyń jelisi boıynsha jasal­ǵan. «Astana Operanyń» reper­týaryndaǵy shyraıly shyǵarma jaqynda ǵana kórermen nazaryna usynyldy. Qoıylymdy astanalyq sahnaǵa Koroldik balet trýppasynyń dástúrin saqtaýshylar – qoıýshy balet­meısterler Karl Bıornett pen Patrı­sııa Rýann ala kelgen. Onyń qoıýshy dırıjeri Ar­man Orazǵalıev. Orkestrge óń­de­gen – Martın Iets. Atap ótetin mańyzdy jaıt, spek­takl Reseıdiń Halyq árti­si, balet trýppasynyń kórkem­dik jetekshisi Altynaı Asyl­muratovanyń arqasynda teatr­dyń qorjynyn tolyq­tyr­dy. Áıgili ónerpazdyń ózi birneshe ret basty Manon partııasyn aty ańyzǵa aınalǵan londondyq sahnada bılep, Kennet Mak­mıllanmen birge beıneni jasaýda jumys atqarǵan. Onyń osy jaýhar týyndyny elorda sahnasyna alyp kelý týraly usynysyn qoıýshy top qýana qabyl aldy.

– M.Jarrdyń «Parıj Qudaı anasynyń soboryn» «Astana Opera» teatrynyń trýp­pasy Marııa teatry (Sankt-Peterbýrg) men Karlo Felıche (Italııa) sahnasynda oryndaǵan edi, biraq «Manon» baletin gastrol aıasynda alǵash ret usynbaqpyz. Qazirgi tańda bul horeografııalyq týyndyny aǵylshyn klassıkasy dep sanaıdy. Spektaklde árdaıym jaǵymdy keıipkerler bolady, kórermender olardyń qasiretine ortaqtasady, áıtsede, jaǵymsyz beıneler de joq emes, biraq qoıýshy rejısser oqıǵany sheber jetkizgeni sonshalyq, biz barlyq qaharmanǵa jyly shyraı tanytyp, ýaıym-qaıǵysyna ortaqtasyp otyramyz, – dedi Altynaı Asylmuratova.

Mundaǵy Manon partııasyn Qazaqstannyń eń­bek sińirgen qaıratkeri Mádı­na Basbaeva oryndady. Almaty­daǵy gastroldik sapar Mo­rıs Jarrdyń «Parıj Qudaı ana­synyń sobory» balet spektaklin kórsetýmen aıaqtalady. 

Mereı DILDABAEV