Sýretti túsirgen Aıbatyr NURASh
- Elimizde salynatyn tórtinshi munaı óńdeý zaýytynyń tehnıkalyq qujattary qazir jasalý ústinde. Jol kartasy jasalyp, mamandar jumys istep jatyr. Onyń qaı óńirde salynatyny bıylǵy qazan-qarasha aılarynda belgili bolady, - dedi Qanat Bozymbaev.
Mınıstrdiń aıtýynsha, «Kondensat» AQ-nyń Qarashyǵanaqta salynǵan jańa zaýyty jylyna 80 myń tonnadan astam ónim shyǵarýǵa qabiletti. Bul Batys Qazaqstan oblysynyń ishki qajettiligin tolyq óteı alady. Eger taıaýdaǵy 1-2 aı ishinde zaýyttyń dızel otynyn óńdeıtin jelisi iske qosylatyn bolsa, mınıstrlik zaýytty shıkizatpen qamtamasyz etý máselesin sheshedi. «Zaýyt osy bir-eki aı ishinde jańa jelisin iske qossa, kásiporyn jumys isteýge qajetti shıkizatty Atyraýdan nemese osy Qarashyǵanaq kenishinen berý máselesin sheshemiz» dedi Qanat Bozymbaev. Aıta keteıik, qazynaly kenishtiń dál ústinde otyrǵan otandyq kásiporyndy shıkizatpen qamtý buǵan deıin talaı márte tyǵyryqqa tirelip, shıki munaı ózge óńirden tasylyp kelgen edi.
Mınıstr Bozymbaev jergilikti turǵyndardyń narazylyǵyn jıi týǵyzatyn másele – gaz tarıfi týraly da aıtty. «Tegin gaz joq, bolmaıdy da» degen Qanat Aldabergenuly batysqazaqstandyqtar tutynyp otyrǵan Qarashyǵanaq gazynyń quramynda kúkirt kóptigin, ony óńdeý qymbatqa túsetinin jáne shetelde – Orynborda óńdeletinin aıtyp, «tarıfti tómendetý múmkindigi joq» dedi.
- Qarashyǵanaq gazynyń Orynborda óńdelip, qaıtadan ózimizge kelgen kezde shekaradaǵy quny – 43 dollardan. Shıkizattyń ózindik quny, óńdeýge, tasymaldaýǵa qansha shyǵyn ketetini tolyq baqylaýda. Ras, batysqazaqstandyqtar Aqtóbe, Atyraý, Aqtaýmen salystyrǵanda qymbattaý gaz tutynady. Onyń sebebi – Aqtóbe gazy ózderinde óńdeledi, ári shıkizattyń sapasy da jaqsy. Atyraýda da osyndaı jaǵdaı, TShO-nyń óńdeý zaýyty salystyrmaly túrde arzan ónim shyǵarady. Biraq Shymkent, Almaty, Jambyl óńirlerinde gaz baǵasy Oraldan qymbat qoı. Bul jerde tarıf ónimniń ózindik qunyna baılanysty túziledi. Biz, mınıstrlik tarapynan tarıfterdiń ashyqtyǵyn qatań baqylaıtyn bolamyz, - dedi Qanat Bozymbaev.
Mınıstr bıyl jyl ortasyna taman Parlamentte «Turǵyn úı qatynastary týraly» jańa zań qaralatynyn, bul zań boıynsha óńirlerde gaz-tehnıkalyq ınspeksııa qyzmetin qurý máselesi qarastyrylatynyn aıtty. «Halyqpen kezdeskende jıi estip júrmiz, «Qaztransgazaımaq» mekemesine aıtylatyn syn kóp. Gaz-tehnıkalyq ınspeksııa qurylar bolsa, jergilikti bılik oryndary gaz tasymaldaýshy qurylymdardyń jumysyn baqylap, yqpal etý tetigine ıe bolady. Munyń ózi turǵyndardy kógildir otynmen qamtý máselesinde kezdesetin keıbir túıtkilderdi ońynan sheshýge tıis, - dedi mınıstr.
Qazbek QUTTYMURATULY,
«Egemen Qazaqstan»
Oral
