Tımýr Toqtabaevtyń aıtýynsha, Memleket basshysy 2018 jylǵy qańtar aıyndaǵy Qazaqstan halqyna Joldaýynda Almatyda ornalasqan «Alataý» ınnovasııalyq tehnologııalar parki» arnaıy ekonomıkalyq aımaǵynyń qyzmetin uıymdastyrýdy túbegeıli qaıta qaraýdy tapsyrdy.
Innovasııalyq kəsiporyndarǵa arnalǵan jeńildetilgen rejımder jumys isteıtin AEA Úkimet sheshimimen tikeleı Almaty qalasynyń ákimdigine beriledi. Ol joǵary tehnologııalyq óndiris baǵyttarynyń sanyn keńeıtýmen aınalysady.
«О́z kezeginde, AEA basqarýshy kompanııasy – ITP derbes klasterlik qory – QR IDM qaramaǵynan QR AKM-ǵa aýysady. Aqparat jáne kommýnıkasııalar mınıstrligi «Sıfrlyq Qazaqstan» memlekettik baǵdarlamasyn iske asyrýdyń basty úılestirýshi organy bolǵandyqtan osyndaı sheshim qabyldandy. Sebebi ITP aıasynda júzege asyrylatyn jobalardyń 80% ekonomıkany sıfrlandyrýmen jáne sıfrlyq eksportpen tikeleı baılanysty», — dedi Tımýr Toqtabaev.
Bul «Ekspo-2017» bazasynda AT-startaptardyń halyqaralyq tehnoparkin tıimdi qalyptastyrýǵa ári jalpy aqparat jáne kommýnıkasııalar salasyn damytý úshin «ITP» AKT-niń atqarylǵan jumystary men tehnologııalaryn paıdalanýǵa múmkindik beredi.
Málimdelgen derekterge sáıkes 2015–2017 jyldary jer qoınaýyn paıdalanýshylardan «Alataý» ITP AEA-ǵa tartylǵan qarajat 3,5 mlrd teńgeden asty (barlyǵy 35 kompanııa). 2,6 mlrd teńgege 64 joba qarjylandyryldy. Sonyń ishinde 2015 jyly 5 joba (21,4 mln teńge), 2016 jyly — 27 joba (856 mln teńge), 2017 jyly — shamamen 32 joba (1,7 mlrd teńgeden astam).
Jýrnalısterdiń suraqtaryna jaýap bere otyryp, Tımýr Toqtabaev mınıstrlik qaramaǵynan ákimdikke ótkizý kezinde qyzmetkerler jumystan qysqartylmaıtynyn atap ótti. Sonymen qatar qazirgi tańda AEA-nyń ekinshi kezeńi damyp jatyr jáne onyń odan ári keńeıýi qyzmetkerler sanynyń artýyna jol ashady.
«Jalpy, bul «aqyldy» tehnologııalar aıasynda Almaty qalasynyń damýyna oń áser etedi», — dep túıindedi Tımýr Toqtabaev.
