Syrtqy saıasat vedomstvosy basshysynyń EO elderiniń elshilerimen kezekti jumys kezdesýiniń kún tártibi ekijaqty jáne kópjaqty yntymaqtastyqtyń aýqymdy máselelerin qamtydy.
Mınıstr óz sózinde Eýropalyq Odaq elderiniń belsendi qatysýlarymen ótken, ótken jyldyń basty oqıǵalarynyń biri Halyqaralyq mamandyrylǵan «EKSPO-2017» kórmesiniń qorytyndylaryna egjeı-tegjeıli toqtady. Aldaǵy kezeńniń negizgi mindeti retinde EXPO murasyn saqtap qalý qajettiligin atap aıtty. Bul turǵyda, Mınıstr eýropalyq dıplomattarǵa «Astana» Halyqaralyq qarjy ortalyǵynyń, «Bolashaq energııasy» Halyqaralyq ortalyǵynyń jáne IT-startaptar Halyqaralyq parkiniń bolashaq qyzmetteri týraly aıtyp berdi.
Shet elderdiń resmı ókilderi men iskerlik toptarymen áriptestik ornatý úshin týyndaıtyn jańa múmkindikterdi eskere otyryp, Q. Ábdirahmanov eýropalyq seriktesterdi osy jańa platformalar negizinde yntymaqtastyq ornatýǵa shaqyrdy.
Kezdesý qatysýshylary Qazaqstannyń BUU Qaýipsizdik Keńesindegi tóraǵalyǵynyń qorytyndylaryn talqylap, onyń basty is-sharalary retinde Memleket basshysy Nursultan Nazarbaevtyń tóraǵalyǵymen ótken jappaı qyryp-joıý qarýyn taratpaý salasyndaǵy senim sharalaryn nyǵaıtý boıynsha joǵary deńgeıdegi taqyryptyq brıfıngti, sondaı-aq Aýǵanstan men Ortalyq Azııa taqyryby boıynsha mınıstrlik pikirtalasty atap ótti. Dıplomattar atalǵan is-sharalardyń qorytyndylary boıynsha qabyldanǵan BUU Qaýipsizdik Keńesi tóraǵalyǵynyń málimdemeleri osy bedeldi qurylymdaǵa Qazaqstan tóraǵalyǵynyń tabysty ótýine zor yqpal jasaǵanyn atap aıtty.
Elimizdiń ótken jyldaǵy syrtqy saıasatynyń basqa da jetistikteri qatarynda «Astana úderisi» aıasynda Sırııa daǵdarysyn retteýge baǵyttalǵan kelissózderdiń jalǵasýy jáne 2017 jylǵy tamyzda ótken Atom Energetıkasy jónindegi Halyqaralyq Agenttiginiń Tómen baıytylǵan ýran Bankiniń ashylýy týraly sóz qozǵaldy.
Jalpy, eýropalyq dıplomattar Qazaqstanda jáne shetelde ótkizilgen is-sharalar joǵary deńgeıde uıymdastyrylǵanyn aıta kele, olardyń nátıjeleri el aldynda odan da bıik maqsattar qoıatynyna nazar aýdardy.
Mınıstr 2018 jyly syrtqy saıasattyń basymdyqtary retinde elimizdiń BUU Qaýipsizdik Keńesine músheligin laıyqty túrde aıaqtaýdy, Qazaqstannyń ártúrli kópjaqty formattaǵy joǵary deńgeıdegi kezdesýlerin, sonyń ishinde Kaspıı jaǵalaýy memleketteriniń sammıtin uıymdastyrý, Astananyń 20-jyldyǵyn merekeleýge sheteldik áriptesterdiń qatysýyn qamtamasyz etý, sondaı-aq, Álemdik jáne dástúrli dinder lıderleriniń VI sezin ótkizýdi atap ótti.
Kezdesýdiń mańyzdy bóligi Eýropalyq Odaqpen yqpaldastyqtyń serpindi damýyna arnaldy. Eýropalyq Odaq Qazaqstannyń iri saýda-ekonomıkalyq jáne ınvestısııalyq áriptesi bolyp qala beretindigi atalyp ótti (Eýropalyq Odaq Qazaqstannyń saýda seriktesteri arasynda jalpy 49,8% úleske ıe; 2017 jyly Qazaqstan men EO arasyndaǵy taýar aınalymy 6 mlrd. dollarǵa artyp, jalpy 30 mlrd. dollardan asty). Qazaqstannyń EO-men saýda-sattyqty ártaraptandyrýǵa múddeliligi jáne Qazaqstannan Eýropa elderine shıkizattyq emes eksportty keńeıtýdiń yqtımal joldaryn izdestirý qajettiligi aıtyldy.
Yntymaqtastyqtyń mańyzdy nátıjeleriniń biri 2015 jyly Qazaqstan men Eýropalyq Odaq arasyndaǵy Keńeıtilgen áriptestik jáne yntymaqtastyq týraly kelisimge qol qoıylýy, ony 2016 jyldyń mamyr aıynan bastap jartylaı qoldanylýynyń bastalýy, sondaı-aq EO-ǵa múshe memleketterimen ratıfıkasııalaýynyń oń qarqyny (EO-nyń 28 múshe-memleketteriniń 21-i ratıfıkasııalady) jáne onyń Eýropalyq Parlamenttimen maquldanýy. Kelisimniń tolyq kúshine enýi úshin qujatty EO-nyń barlyq elderiniń ratıfıkasııalaýy qajet.
Mınıstr Eýropa elderiniń ókilderin Memleket basshysynyń «Tórtinshi ındýstrıaldy revolıýsııa jaǵdaıynda damýdyń jańa múmkindikteri» taqyrybyndaǵy Qazaqstan halqyna Joldaýyna engen modernızasııalaý, sıfrlandyrý, ınnovasııalyq tehnologııalardy engizý jáne iskerlik ahýaldy jaqsartý sııaqty perspektıvaly salalarda qoljetimdi múmkindikterdi belsendi paıdalanýǵa jáne EO-nyń múddeli kompanııalaryn Qazaqstanǵa tartý boıynsha jumys júrgizýge shaqyrdy.
Eýropalyq Odaqpen yntymaqtastyqty damytýdyń taǵy bir mańyzdy mindeti vızalyq rejımdi jeńildetý bolyp tabylady, ol úshin Qazaqstan men Eýropalyq Odaq osy máseleni sheshýde eleýli qadam jasaýǵa yqpal etetin belsendi konsýltasııalar júrgizedi.
Talqylaý barysynda eýropalyq dıplomattar Qazaqstanda zańnyń ústemdigin qamtamasyz etý jáne qoǵamdyq ómirdiń túrli salalarynda zańnamany jetildirý úshin ınstıtýsıonaldyq reforma júrgizý boıynsha suraqtaryna jaýap aldy. Syrtqy ister mınıstri elshilerdiń qazaqstandyq bıliktiń halyqaralyq máseleler boıynsha sarapshylarmen jáne quqyqtyq máseleler boıynsha mamandandyrylǵan úkimettik emes uıymdarmen yntymaqtastyqta ashyq ekenin kórsetetindigine nazaryn aýdardy. Kez kelgen qyzyǵýshylyq týdyratyn jaǵdaıda, syndarly ózara árekettesýge jáne túsindirý jumystaryna erekshe mán beriledi. Qazaqstannyń bul ustanymy kóptegen sheteldik seriktester arasynda túsinistik pen qoldaý tabady.
Kezdesý qatysýshylary 2019 jyly aıaqtalýy josparlanǵan EO-nyń Ortalyq Azııa úshin Strategııasynyń jańartý prosesin quptady. Q. Ábdirahmanov Qazaqstannyń óńirdegi barlyq elderdiń múddelerin eskere otyryp, Strategııanyń tıimdiligin qamtamasyz etý maqsatynda ony jetildirý jónindegi jumysty belsendi túrde jalǵastyrýǵa daıyn ekendigin atap ótti. Qazaqstandyq tarap basymdy baǵyttardyń qatarynda shaǵyn jáne orta bıznestiń damýy, kóliktik-logıstıkalyq ınfraqurylym, energııa tıimdiligi, qorshaǵan ortany qorǵaý, bilim berý jáne basqalaryn da atap ótti.
Eske salaıyq, 2018 jylǵy 2 aqpanynda Qazaqstan men Eýropalyq Odaq arasyndaǵy dıplomatııalyq qarym-qatynastarynyń ornaǵanyna 25 jyl toldy.
