О́z sózinde Memleket basshysy Qytaı tóraǵasy Sı Szınpınniń 2012 jyly Qazaqstanǵa jasaǵan saparyn eske aldy. Dál sol kezde S.Szınpın Nazarbaev ýnıversıtetinde dáris oqyp, «Bir beldeý - bir jol» bastamasyn jarııalaǵan bolatyn.
«Sodan beri bes jyl ótti. Negizi, atalǵan bastama der kezinde kóterildi. Sebebi daǵdarystyń saldary áli de sezilip turdy. Biz bolsaq, «Nurly jol» baǵdarlamasyn qabyldap, Qytaıdyń bastamasymen úndestirýge tyrystyq. Sebebi Eýropaǵa baratyn jol Qazaqstan arqyly ótedi. Sodan Alashańqaıdan temir jol tartyldy. «Qorǵas» qurǵaq porty salyndy. Qazaqstannyń ońtústigi arqyly ótetin taǵy bir temirjol bar. «Batys Qazaqstan - Batys Qytaı» avtomagıstrali salyndy. Onyń jalpy uzyndyǵy - 2 700 shaqyrym. Bunyń barlyǵy ortaq jumysty, birlesken bastamany iske asyrýǵa óz septigin tıgizdi», - dedi N.Nazarbaev.
Budan bólek, Qytaıdyń Lıanıýngan portynda Qazaqstannyń termınaly ashyldy. Sol arqyly konteınerlik júk tasymaldy barynsha jedeldetýge múmkindik bar.
«Endi, Ońtústik-Shyǵys Azııa elderi óz júkterin Eýropaǵa 12-15 kúnniń ishinde jetkizip otyrady. Teńiz arqyly ondaı tasymal eki-úsh esege uzaq bolady. Lıanıýngan porty arqyly ótetin konteınerlerdiń sany birtindep kóbeıip keledi. Al joldyń boıynda kásiporyndar ashylyp jatyr. Osy jolmen Kaspıı teńizine shyǵyp, odan ary qaraı Iran arqyly Parsy shyǵanaǵyna shyǵa alamyz. Osylaısha, qytaılyq taýarlardy Qazaqstan arqyly sol jaqqa emin-erkin tasymaldaýǵa bolady. Ázerbaıjan arqyly Grýzııa men Túrkııaǵa shyǵýǵa múmkindik bar. Biz arnaıy Quryq portyn ashtyq. Budan bólek, biz Qazaqstanda ondaǵan jańa kásiporyndardy ashýǵa ýaǵdalastyq. Mine, osyndaı úlken jumystar atqaryldy. Sondyqtan «Bir beldeý - bir jol» bastamasy der kezinde kóterildi dep aıtýǵa tolyq negiz bar», - dedi N.Nazarbaev.
