Áýe apaty Isfahan provınsııasynda boldy. Laıner Tegerannan Iаsýdjge bet alyp kele jatqan. Habarlanǵandaı, Aseman Airlines kompanııasyna tıesili áýe kemesi Semır eldi mekenine jaqyn jerde qulaǵan. Ushaq bortynda 60 jolaýshy men 6 ekıpaj múshesi boldy. Olardyń barlyǵy ajal qushty.
Ushaq qulaǵan jerge jiberilgen tikushaq aýa raıynyń qolaısyzdyǵynan qona almaýda, jedel járdem qyzmeti apat ornyna jetti. Aldyn ala málimetterge súıensek, áýe kemesiniń ekıpajy ushaqty apatty jaǵdaıda Isfahan provınsııasyndaǵy fermalardyń mańyna qondyrmaq bolǵan.
Iranda apatqa ushyraǵan jolaýshylar ushaǵynda Qazaqstan azamattary bolǵan joq. Bul týraly QR Syrtqy ister mınıstrliginiń baspasóz qyzmetiniń basshysy Ánýar Jaınaqov málim etti. «Aldyn ala málimet boıynsha, Iranda apatqa ushyraǵan ushaq bortynda Qazaqstan azamattary bolǵan joq», - dedi Á.Jaınaqov.
