Is-sharanyń ashylýynda, Qazaqstannyń Jenevadaǵy Turaqty ókili Janar Aıtjanova jasandy ıntellektini jáne kıberqaýipsizdikti damytýdyń, sonymen qatar zamanaýı ıadrolyq qarýlar júıesin jańǵyrtýmen baılanysty jańa syndarǵa qarsy áreket etýge arnalǵan halyqaralyq sharalardy qoldanýdyń mańyzdylyǵyn atap ótti.
Jıynda Turaqty ókil 2018 jylǵy 18 qańtarda ótken BUU Qaýipsizdik Keńesindegi Prezıdent Nursultan Nazarbaevtyń: «ǵylymı-tehnologııalyq progrestiń qazirgi múmkindikteri jáne jahandanýdyń shynaıy bolmysy jappaı qyryp-joıatyn qarýdy taratpaý mindetin adamzattyń aman saqtalyp qalý máselesine aınaldyryp otyr», degen sózine ekpin berdi. Sol sebepti jappaı qyryp-joıý qarýynyń jańa túrlerin jasaý úshin ǵylymı ashýlardy qoldanýǵa tyıym salý boıynsha halyqaralyq qujattardy ázirlep, mindetti oryndaý mańyzdy bolyp keledi. Bul oraıda «Álem. XXI ǵasyr» manıfesinde atalyp ótkendeı, BUU jappaı qyryp-joıý qarýyn jasaýǵa jáne ony jetildirý úshin qoldanýy múmkin ǵylymı ashýlardyń esebin júrgizý boıynsha reestr qurý qajet.
Jenevadaǵy BUU Bólimshesiniń bas dırektory, Qarýsyzdandyrý boıynsha Konferensııanyń bas hatshysy Maıkl Mıoller keleshektegi daý-janjaldardyń sıpatyn ózgertetin jańa tehnologııalardy zertteýdiń jáne olardyń áser etýiniń ýaqyty kelgenin aıtty.
Dóńgelek ústelge shaqyrylǵan sarapshylar qatysýshylarǵa dúnıe júziniń jetekshi elderindegi áskerı-óndiristik keshenderden qabyldanǵan sońǵy ǵylymı óńdeýler salasyndaǵy qazirgi zamanǵy tendensııalar jóninde aıtyp, sonymen birge qarýsyzdandyrý jáne taratpaý rejiminiń potensıaldy syndaryn baǵalady.
Qarýsyzdandyrý boıynsha konferensııa janyndaǵy Brazılııa elshisi Gýlerme Patrıota qarýsyzdandyrý salasyndaǵy óz eliniń bastamalary men jańa tehnologııalardy damytý amaldaryn atap ótti.
Pagýosh ǵalymdary qozǵalysy Jeneva bólimshesiniń dırektory Sergeı Basanov ıadrolyq qarýdy jańǵyrtýdan qazirgi dúbirli halyqaralyq jaǵdaıda týyndaıtyn qaýip týraly eskertti.
Sonymen qatar ol Qazaqstan Prezıdenti N.Nazarbaevtyń BUU Qaýipsizdik Keńesindegi saıası senimdegi halyqaralyq ómirge qaıta oralý jáne júıeli dıalogtyń qajettiligi týraly sózin arnaıy atap kórsetti.
QK janyndaǵy Germanııa Turaqty ókildiginiń orynbasary Toralf Pıls jáne Qarýsyzdandyrý máselelerin zertteý boıynsha BUU Instıtýty dırektorynyń mindetin atqarýshy Kerstın Vıgnard sýyq qarýdyń avtonomdyq júıesin damytý jáne atalǵan salany retteý boıynsha tushymdy usynystar jóninde aıtyp berdi.
Barlyq qatysýshylar beıbitshilik pen qaýipsizdikti saqtaý salasyndaǵy ózekti máselelerdi talqylaýǵa múmkindik bergeni úshin Qazaqstan tarapyna alǵys bildirdi. Osy pikirtalastyń qarýsyzdandyrý jáne taratpaý rejimin nyǵaıtyp, ony retteý mehanızmderin óńdeýge sebep bolatyndyǵyna senim bildirildi.
Is-sharaǵa London ýnıversıtetiniń stýdentteri, múshe memleketterdiń ókilderi men BUU baıqaýshylary qatysty, sonyń ishinde ǵylymı-zertteý ınstıtýttarynyń jáne úkimettik emes uıymdardyń sarapshylary bar.
«Egemen-aqparat»
