Qazaqstan Respýblıkasy Prezıdentiniń Jarlyǵy

Qazaqstan Respýblıkasynyń 2025 jylǵa deıingi Strategııalyq damý josparyn bekitý jáne Qazaqstan Respýblıkasy Prezıdentiniń keıbir jarlyqtarynyń kúshi joıyldy dep taný týraly

QAÝLY ETEMIN:

1. Qazaqstan Respýblıkasynyń 2025 jylǵa deıingi Strategııalyq damý jospary bekitilsin.

2. Qazaqstan Respýblıkasynyń Úkimeti, ortalyq jáne jergilikti atqarýshy organdar, sondaı-aq Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdar óz qyzmetinde Qazaqstan Respýblıkasynyń 2025 jylǵa deıingi Strategııalyq damý josparyn basshylyqqa alsyn jáne ony iske asyrý boıynsha qajetti sharalar qabyldasyn.

3. Osy Jarlyqqa qosymshaǵa sáıkes Qazaqstan Respýblıkasy Prezıdentiniń keıbir jarlyqtarynyń kúshi joıyldy dep tanylsyn.

4. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.

5. Osy Jarlyq qol qoıylǵan kúninen bastap qoldanysqa engiziledi.

Qazaqstan Respýblıkasynyń Prezıdenti

N.NAZARBAEV

Astana, Aqorda, 2018 jylǵy 15 aqpan  № 636

«Qazaqstan Respýblıkasynyń 2025 jylǵa deıingi Strategııalyq damý josparyn bekitý jáne Qazaqstan Respýblıkasy Prezıdentiniń keıbir jarlyqtarynyń kúshi joıyldy dep taný týraly» Qazaqstan Respýblıkasy Prezıdentiniń
2018 jylǵy 15 aqpandaǵy № 636 Jarlyǵyna

TÚSINDIRME

Qazaqstan Respýblıkasy Pre­zı­dentiniń 2018 jylǵy 15 aqpandaǵy № 636 Jarlyǵymen «Qazaqstan Res­pýb­lıkasynyń 2025 jylǵa deıingi Stra­tegııalyq damý josparyn bekitý jáne Qazaqstan Respýblıkasy Prezıdentiniń keıbir jarlyqtarynyń kúshi joıyldy dep taný týraly» Qazaqstan Res­pýb­lıkasynyń 2025 jylǵa deıingi Stra­tegııalyq damý jospary (budan ári – Strategııalyq jospar-2025) bekitildi.

Strategııalyq jospar-2025 Mem­le­kettik josparlaý júıesiniń negizgi qu­jaty retinde aıqyndalyp, álemniń eń damyǵan 30 eli qataryna kirý jo­lyn­daǵy «Qazaqstan-2050» uzaq merzimdi stra­tegııa­syn iske asyrýdaǵy memleket da­mýynyń orta merzimdi jospary bolyp tabylady. Ol Qazaqstannyń 2020 jyl­ǵa deıingi Strategııalyq damý jos­parynyń ornyn basady, al onyń josparly iske asyrylýy ulttyq ekonomıkanyń naqty kóleminiń úshten birindeı ósýin qam­tamasyz etti, sondaı-aq jahandyq qar­jy­lyq daǵdarystyń saldaryn báseń­detti.

Qujattyń basty maqsaty – 2025 jylǵa deıin EYDU elderimen salystyrǵanda halyqtyń ómir súrý deńgeıin arttyrýǵa baǵyttalǵan ekonomıkanyń sapaly jáne ornyqty damýyna qol jetkizý.

Strategııalyq jospar-2025-tiń negizine ekonomıkalyq ósýdiń jańa mo­deli salynǵan, ol básekelestiktiń artýy, jeke sektordyń kóshbasshylyq róli men eli­mizdiń óńirleri damýynyń áleýetin iske asyrý jaǵdaıynda adamı kapıtaldy damytý men jeke qarajatty tartý, kúr­delilik pen ónimdilikti arttyrý esebi­nen eksportqa baǵyttalǵan óndirýdi yn­ta­landyrýǵa negizdelgen.

Bul úshin qujatta eldiń ekonomıkasy men áleýmettik ómirinde bolatyn júıeli reformalardy júrgizý, sondaı-aq ınstıtýsıonaldyq jańǵyrtýǵa baı­lanys­ty sharalar qabyldaý kózdelgen.

Strategııalyq jospar-2025-tiń negizi – Strategııa-2050-diń negizgi erejelerin iske asyrýdy qamtamasyz etetin 7 júıeli reforma men 7 basym saıasattyń úılesimi. 7h7 jospardyń formýlasy Qazaqstannyń jahandyq básekege qabilettilikke qol jetkizýi úshin damý men turaqtylyqtyn teńgerimin qamtamasyz etedi.

Jeti júıeli reforma el ómiriniń barlyq negizgi aspektilerin qamtıdy: «Jańa adamı kapıtal», «Tehnologııalyq jańartý men sıfrlandyrý», «Báse­keles­tik jáne básekege qabiletti bıznes», «Sy­baı­las jemqorlyqsyz quqyqtyq memle­ket», «Myqty óńirler men ýrbandalý», «Qoǵamdyq sanany jańǵyrtý», «Mem­lekettik sektor ózgerister kóshbasshysy retinde».

Strategııalyq jospar-2025-ti iske asyrý memlekettik baǵdarlamalar, mem­lekettik organdardyń strategııalyq jos­parlary, óńirlerdi damytý baǵdar­lamalary, ulttyq holdıngter men kom­pa­nııalardyń strategııalary arqyly, son­daı-aq qoldanylatyn jobalyq basqarý aıasynda iske asyrylatyn bolady.

Josparda 2021 jáne 2025 jyldary qol jetkizilýge tıis maqsatty nátı­jelerdi kórsetetin ózekti ulttyq ındı­ka­torlardyń negizi qalanǵan.

Qazaqstan Respýblıkasy Prezıdenti Ákimshiliginiń Strategııalyq ázirlemeler jáne taldaý ortalyǵy

Strategııalyq jospar-2025-tiń tolyq mátini Qazaqstan Respýblıkasy Prezıdentiniń www.akorda.kz resmı saıtynda «Normatıvtik quqyqtyq aktiler» bóliminde ornalastyrylǵan.