Shara barysynda basqarma tóraǵasy Elbasynyń Qazaqstan halqyna Joldaýynda belgilengen tapsyrmalardyń mańyzdylyǵyn tilge tıek etti.
«О́ńdeý ónerkásibi sektoryn damytý, eńbek ónimdiligin arttyrý jáne ındýstrııalandyrýdyń ınnovasııalyq damýynyń qajettiligine basymdyq berilgeni – ózekti ári ýaqytynda jasalǵan baǵdar. Biz Elbasynyń Joldaýyn egjeı-tegjeıli saraptap, ózimizdiń josparymyzdy daıyndap aldyq. Jalpy, kásipkerlik tóńireginde aıtatyn bolsaq, elimizdiń negizgi saıasattarynyń biri naryqtyq ekonomıkany kóterý, orta jáne shaǵyn bıznestiń bizdiń ekonomıkamyzǵa qosatyn úlesin kóbeıtý jumystaryna toqtalýǵa bolady. Endi sonyń aıasynda jasalǵan jumystar jóninde aıtsaq, bizdiń tóńirekte bes ártúrli sala bar. Olar makroekonomıkalyq saıasat, aqsha saıasaty, tarıf saıasaty, tórtinshi – kásipkerliktiń quqyqtyq qorǵaý máselesi, besinshisine ózimizdiń ındýstrııalyq saıasatymyzdy jatqyzýǵa bolady. Osyndaı bes saıasat boıynsha aýqymdy jumystar atqarylyp jatyr», dedi ol.
Sonymen qatar jıyn barysynda «Atameken» ulttyq kásipkerler palatasy basqarma tóraǵasynyń orynbasary Eldar Jumaǵazıev «Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasy» aıasynda júzege asyrylyp jatqan jumystarǵa toqtalyp, «Kásipkerlik jáne bıznes negizderi» páni qashan engiziletin atap ótti.
«Memleket basshysy «Atameken» UKP-nyń jappaı kásipkerlikti damytý jumysyna joǵary baǵa berdi. Ulttyq palata «Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasy» aıasynda júzege asyrylyp otyrǵan «Bastaý Bıznes» jobasynyń bastamashysy ekeni belgili. 2017 jyly aýylda turatyn 15000 azamat oqytylyp, nátıjesinde 3000-nan asa adam óz kásibin ashty jáne jumys istep turǵan bıznesin ulǵaıta aldy. Sondaı-aq biz 2015 jyly «Kásipkerlik jáne bıznes negizderi» pánin engizý týraly usynys jasaǵan bolatynbyz. Bilim jáne ǵylym mınıstrligi ony qoldady. Qazir bul oqýlyq daıyn dep aıtýǵa bolady. Ol 2018 jyldan bastap qanatqaqty joba retinde, al 2019 jyldan bastap mektep baǵdarlamasyna enedi. Bul pánniń basqa pánderden aıyrmashylyǵy, ol ınteraktıvti túrde oqytylady. Jáne biz osyǵan baılanysty portal daıyndap jatyrmyz. Taǵy da aıtaıyn, bul pán daıyn, aldaǵy 2019 jyldyń qyrkúıek aıynan bastap oqytylady», dedi Eldar Jumaǵazıev.
Raýan QAIDAR,
«Egemen Qazaqstan»
