Mańyzdy jıynǵa «Qazaqstan» telearnasynyń dırektory A.Turǵanbekov, L.N.Gýmılev atyndaǵy EUÝ rektory E.Sydyqov, Parlament Májilisiniń depýtattary, QHA músheleri, ǵylymı jáne shyǵarmashylyq zııaly qaýym ókilderi qatysty.
Elbasy Nursultan Nazarbaev «Týǵan jer» baǵdarlamasy aıasynda oryndalýy tıis birneshe mindetterdi erekshe atap aıtqan bolatyn. Aptalyq barysynda astanalyq kórermenderdiń nazaryna usynylǵan «Týǵan jer» fılmi de osy baǵyttaǵy birqatar jumystardyń jemisti jalǵasy deýge bolady.
Qazaqstan halqy Assambleıasy muryndyq bolǵan kıno aptalyǵy bıyl elimizdiń jetekshi oqý oryndarynyń bazasynda ótpek. Joǵary oqý oryndarynyń stýdentterinen bastap barlyq qazaqstandyqtar bir apta boıy otandyq rejısserlerdiń «Amanat», «Zaman-aı», «Stalınge syılyq», «Jeruıyq», «Aljır», «Oralman», «Jat» fılmderin tamashalaıtyn bolady. Búginde Qazaqstan halqynyń tarıhy men mádenıetin nasıhattaý, tarıhı jadyny saqtaý, jastarǵa patrıottyq tárbıe berý jáne jalpyulttyq birlikti nyǵaıtý maqsatynda uıymdastyrylǵan bul aptalyq kópshiliktiń kóńilinen shyǵyp otyr.
Sharanyń ashylý saltanatyna jınalǵan kórermender arasynda halyq qalaýlylary da tyń kartınany tamashalap, telehıkaıadan alǵan áserlerimen bólisti. Parlament Májilisiniń depýtaty Saýytbek Abdrahmanov óz sózinde mereke qarsańyndaǵy bul ıgilikti sharanyń elimizdegi turaqtylyq pen birlikti nasıhattaıtyn mańyzyna toqtaldy. «Soǵys jyldarynda sol zulmat zamannyń saıasatyna baılanysty tutas halyqtardy bizdiń elimizge deportasııalap alyp keldi. Sol kezde qazaq halqynyń darhan jany, úlken júregi osy keń-baıtaq dalany barlyq ulttar men ulystardyń ortaq otanyna aınaldyrdy. Sondyqtan da Prezıdent «Rýhanı jańǵyrý» baǵdarlamasy aıasynda «Týǵan jer» baǵdarlamasyn jasaýdy usynyp, osy boıynsha úlken jumystar júrgizýdi tapsyrdy. Sonyń negizinde atqarylǵan isterdiń bireýi osy «Týǵan jer» fılmi bolyp otyr. Onda Qazaqstandaǵy koreı etnosynyń taǵdyryn bir otbasynyń ómiri arqyly kórsetedi. Mundaı mysaldardy biz Qazaqstandaǵy kez kelgen ózge ult ókilderiniń basynan baıqaımyz. Olardyń qazaqtarmen ara-qatynasyndaǵy meıirimdilik minezderi týyndyǵa túpki ıdeıa bolǵan», dedi S.Abdrahmanov.
Týra sol ýaqytta bul is-shara Almaty qalasynda ál-Farabı atyndaǵy QazUÝ О́.Joldasbekov atyndaǵy Stýdentter saraıynda «Amanat» kórkem fılminiń kórsetilimimen bastaldy.
Mıras ASAN,
«Egemen Qazaqstan»
