Foto: Temirbolat TOQMÁMBETOV
«Altaır» qurylys kompanııasy qurylys jumystaryn 2017 jyldyń naýryz aıynda bastaǵan edi. Mine, bir jyl ishinde 6 korpýstan turatyn sáýletti ǵımarat daıyn boldy.
600 oqýshyǵa arnalǵan mektepte barlyǵy 56 oqý kabıneti bar. Onyń 4-ýi mýltımedııalyq, 4-ýi ınformatıka kabıneti bolsa, fızıka, bıologııa, hımııa pəni kabınetteri arnaıy zerthanalarmen jabdyqtalǵan. 25 oqýshyǵa arnalǵan oqý zalymen qamtylǵan kitaphana, 200 oryndyq akt zaly men qos sport zaly, 130 oryndyq ashana oqýshylardyń alańsyz bilim alýyna tolyq múmkindik beredi. Sondaı-aq oqýshylardy jan-jaqty tárbıeleý maqsatynda arnaıy 2 oqý sheberhanasy da jasaqtalǵan. Jeti kabınet ınteraktıvti taqtamen jabdyqtalsa, mektep radıosy úshin de bólme arnalǵan. Odan bólek psıholog, logoped jáne medqyzmetkerlerge de arnaıy kabınetter qarastyrylǵan. Mektepte ónerli balalarǵa arnalǵan «Shabyt» ortalyǵy da jumys jasamaq.
Jınalǵan qaýymdy aıtýly sharamen quttyqtaǵan oblys əkimi Altaı Kólginov Elbasynyń bıylǵy Joldaýynda bilim berý salasyna erekshe kóńil bólingendigine toqtaldy.
– Osyndaı mektep ǵımaratynyń salynýy – eń aldymen memlekettiń zor qoldaýynyń nətıjesi. «Nurly jol» baǵdarlamasy boıynsha oblysta mektep qurylysy úshin 3,5 mlrd teńge bólinip, barlyǵy 2400 balaǵa arnalǵan 4 mektep qurylysy qolǵa alynǵan edi. Sonyń birin búgin saltanatty jaǵdaıda ashyp otyrmyz. Bıyl Elbasy óziniń halyqqa Joldaýynda bilim berý salasyna erekshe toqtaldy. Sonyń ishinde jańartylǵan baǵdarlama boıynsha oqýdan ótken muǵalimderdiń jalaqysyn 30-50%-ǵa ósirý týraly aıtty. Biz de óz tarapymyzdan muǵalimderdiń biliktiligin arttyrý məselesine mən beremiz. Sondaı-aq mektepterdiń tehnıkalyq qamsyzdandyrylýy udaıy nazarda. Oblys boıynsha aýyldarda 223 shaǵyn jınaqtalǵan mektep bar. Bıyl olardy sapaly elektrondy kontentpen qamtıtyn bolamyz. Bul óz kezeginde qala men aýyl mektebiniń arasyndaǵy aıyrmashylyqty azaıtýǵa septigin tıgizedi. Bilimdi urpaq – eldiń bolashaǵy. Táýelsizdigimizdi nyǵaıtyp, alǵa jeteleıtin búgingi oqýshylar. Sondyqtan memleket olardyń sapaly bilim alýyna barlyq múmkindikti jasap otyr, dedi Altaı Seıdiruly.
Jańa mektep 25 synypqa 500 balany qabyldap otyr. Sondaı-aq mektep janynan 100 balaǵa shaǵyn ortalyq jumys jasaıtyn bolady.
Aıta ketý kerek, bıyl Aqjaıyq, Bórli, Qaztalov aýdandarynda da jańa bilim oshaǵynyń qurylysy júrýde. Jyl saıyn mektep oqýshylarynyń sany da artyp keledi. Máselen qazirgi tańda oblys boıynsha oqýshylardyń sany 48 myńnan assa, onyń 2900-y tek sońǵy oqý jylynda qosylǵan.
Qazbek QUTTYMURATULY,
«Egemen Qazaqstan»
Batys Qazaqstan oblysy
