Talapqa saı emes ónimderdi anyqtaý boıynsha oblysta tekserý jumystary turaqty túrde júrgizilip keledi. Barlyq saýda oryndary qamtylǵan dese de bolady. Jergilikti turǵyndarǵa saýdalanyp kele jatqan ónimderdiń qaýipsizdigine aı saıyn monıtorıng júrgizilip, tamaq ónimderin shyǵaratyn kásiporyndar josparly túrde tekserilýde. 2017 jyly 3,5 mıllıon teńgeniń ónimi satyp alynǵan bolatyn. Saraptama qorytyndysy anyqtaǵandaı, byltyr satyp alynǵan úlginiń 17,2 paıyzy qoldanystaǵy zańnama talaptaryna sáıkes kelmegen. Sonyń ishinde tamaq ónimderi – 11,8 paıyz bolsa, balalar oıynshyǵy – 5,2 paıyz, balalar men jasóspirimder zattary (kıim, aıaq kıim) – 5,8 paıyz jáne de opa-dalap ónimderi 6 paıyzdy quraǵan. Sondaı-aq zertteý nátıjeleri turmystyq hımııa zattarynyń 1 paıyzy, jaǵý materıaldary, maılar jáne arnaıy suıyqtyqtardyń 0,7 paıyzy jáne sıntetıkalyq materıaldardyń 0,2 paıyzy talapqa saı emestigin anyqtaǵan. Zań buzýshylyqtyń basym bóligin, ıaǵnı 91,4 paıyzyn markalaýdyń sáıkespeıtindigi qurasa, al 7,7 paıyzynda mıkrobıologııalyq kórsetkishter qaýipsizdigi saqtalmaıdy jáne 4,8 paıyzynda fızıkalyq-hımııalyq kórsetkishteriniń talapqa jaýap bermeıtindigi belgili boldy. Nátıjesinde saýdadan 5 tonna ónim alynyp tastaldy. Sonyń ishinde 324 kılo tamaq ónimi jáne 3 tonna tartatyn hımııa men munaı-hımııa ónimi quraıdy. Anyqtalǵan zań buzýshylyq faktileri boıynsha 162 kásipkerlik sýbektilerine azamattardyń densaýlyǵyna qatysty sanıtarlyq-epıdemıologııalyq salada Qazaqstan Respýblıkasy zańdary talaptaryn buzýdy toqtatyp, zań aıasynda áreket etý týraly eskertpeler de berildi. Jalpy, tekserý nátıjeleri boıynsha 23 mıllıon teńge aıyppul salynǵandyǵyn da aıta ketken oryndy.
Asqar TURAPBAIULY,
«Egemen Qazaqstan»
Aqmola oblysy
