Bala kezden sanamnyń qaltarysynda qalyp qoıǵan sol oqıǵany umyta da bastaǵandaı ekenmin. Keıingi jyldary Respýblıkalyq mýzykalyq koreı teatry Dýlat Isabekovtiń dramatýrgııalyq shyǵarmasynyń jelisimen «Muragerlerdi» sahnalap júr.
Dramatýrgııasy tórt aıaǵynan teń turǵan Isabekovtiń qaı pesasy da osal bolyp kórgen emes. Biraq ózegi myqty materıaldy oınatýǵa, qaǵazdaǵy dúnıeni qan-sólimen tiriltýge akterdiń sheberligi, rejısser suńǵylalyǵy aýadaı qajet. Bireýi aqsasa ujymdyq eńbek zaıa ketti, kórermenine jetpedi dep esepteı berińiz. Árıne bul belgili qaǵıdat qoı. Degenmen men «jek kóretin akterimdi» taǵy da tapqan sııaqtymyn.
Osy «Muragerlerde» teatr synshylary men kórermender úshin qyzý pikirtalas týdyrǵan Syzǵanovty somdaǵan Roman Soıdyń oıyny boldy. «Oınaǵan» demeı, somdaǵan dep otyrǵanymyz Mádenıet qaıratkeri Roman Soı rasynda da ońbaǵan, arsyz jannyń beınesin sonshalyqty sendirip sýrettegennen bolar, keıbir kórermen spektakl sońynda akterǵa kelip: «Sizdi ólerdeı jek kórip otyrdyq» degenin estidik. Akterdi qarapaıym kórermen ǵana emes, múıizi qaraǵaıdaı qazaqtyń ataqty jazýshylary da sonshalyqty «jek kóripti». Pesanyń premerasynan keıin ónertanýshylar basty rólderdi oınaǵan aktrısalardy emes, jalǵyzilikti kempirdiń úıin áıelimen qosylyp tartyp alǵan jolseriktiń oıynyn kópke deıin aıtyp, kópke deıin talqylaýmen boldy. Sheberliktiń shyńy osy, adamǵa emes qaǵazǵa senetin qoǵamda keıýanany zar eńiretip, ómir boıy turǵan, árbir kirpishin ózi qalaǵan qara shańyraǵynan aıyrýǵa, obal men saýapty tárk etip, qara basyn taptaýǵa shynynda da ońbaǵannyń ońbaǵany barady emes pe?! Roman Soıdyń oıynyn alǵash kórgende belgili teatr synshysy Áshirbek Syǵaı: «Roman, sen áli de «dobryısyń». Munan da qatigez bolý kerek. Ondaı qadamǵa baratyn adamnyń betinde bir túıir de kisilik bolmaý kerek» dep keńes bergen eken. Akter osy eskertpeden keıin, ekinshi oıynynda-aq tamasha qorytyndy shyǵaryp, jurttyń «jaǵasyn ustatqany» este.
Endi búginginiń kórermeni qazir qandaı akterlardy «jek kóredi»?
Aınash ESALI,
«Egemen Qazaqstan»
ALMATY
