Jańarǵan kópir

Toǵyz joldyń torabyndaǵy býyrqanǵan Qaratal ózenindegi jarty ǵasyr buryn salynǵan kópirdiń tirekteri mújilip, apatty jaǵdaıda ekendigi anyqtalyp, jóndeý jumysy bastalǵan edi. Endi jańarǵan kópir el ıgiligine berilip, oblys ákimi Ańsar Musahanov taldyqorǵandyqtardy qýanyshymen quttyqtady. Kópir qurylysyna bıýdjetten 415,9 mln. teńge bólinse, bıylǵy maýsym aıynda «Taldyqorǵan Stroı Proekt» jaýapkershiligi shekteýli seriktestigi jobalyq-smetalyq qujattaryn ázirlegen soń jóndeý jumystary bastal­ǵan. Bar jumysty «Asyl Jas» seriktestigi bes aıda jańa tehno­lo­gııalardy qoldaný arqyly sapaly atqardy. Jańa kópirdiń uzyndyǵy – 152, eni 3,5 metrge keńeıtilip, kó­lik ótkizý, júk kóterý múmkindigi edáýir artqan. Osylaısha av­to­kólik quraldarynyń jáne jaıaý júrgin­shilerdiń qaýipsizdigi tolyq qam­tyl­ǵanyna turǵyndar dán rıza. Kólik jáne jaıaý júrginshi júretin bólikteri de keńeıtilip, kópir qurylymy berik jáne ja­ryq­tandyrý qurylǵylarymen qam­­tylǵan. Kóp jumys jasaldy. Jańa kópirdiń aıyrmashylyǵy eskisiniń eni 7 metr bolsa, qazirgisi 12 metr. Kópirdiń qazyqtaryn ashyp, betondap, keńeıtip, qaıta kóterdik. Rıgel temirdi qaıta quıdyq. Bul kóktemgi tasqyn kezinde de esh qıyndyq týǵyzbaıdy, dedi «Asyl Jas» seriktestiginiń dırektory Qazybek Jumageldıev. Jınalǵandar taqtaıdaı túzý jolmen «bárekeldi!» dep jaqsy tilek aıtyp, júrip ótti. Qarsydan aqjol tilegen perishte peıildegi búldirshinder júgirip shyqty. Ájeler dástúrge saı shashý shashyp, jeti nanyn úlestirdi. Jańanyń aty qashanda jańa. Avtokólikter ári-beri júıtkip ótip jatty. Kúmisjan BAIJAN. Almaty oblysy.