«Naqty jumystar júrgizilgenimen óńirler kóktemgi sý tasqynyna tolyqtaı daıyn dep aıtýǵa kelmeıdi. Sheshýdi qajet etetin birqatar problemaly másele bar. Birinshisi, sý qoımalarynyń barlyǵy birdeı tasqyn sýdy qabyldaýǵa daıyn emes. Máselen, Sý kodeksine sáıkes sý sharýashylyǵy uıymdary sýdyń zııandy áserinen eldi mekenderdi, ónerkásiptik nysandardy, aýyl sharýashylyǵy jerlerin qorǵaýdy josparlap, eskertý sharalaryn júrgizýi tıis. Degenmen, muny jergilikti jerlerde jasap otyrǵan joq», - dedi Qalmuhanbet Qasymov.
Máselen, onyń dereginshe, Aqtóbe oblysynda gıdrotehnıkalyq qurylǵylar boıynsha eskertý jospary ázirlenbegen. Aqmola oblysynda aldyn alý sharalary respýblıkalyq menshiktegi 15 gıdrotehnıkalyq qurylǵylarda ǵana josparlanǵan. Al kommýnaldyq menshiktegi 68 nysanǵa qatysty esh jospar joq. Dál osyndaı jaǵdaı Soltústik Qazaqstan oblysynda da oryn alýda. Kommýnaldyq menshiktegi 17 gıdrotehnıkalyq qurylǵyny qorǵaý sharalary uıymdastyrylmaǵan.
«Qazirdiń ózinde Qaraǵandy oblysyndaǵy Samarqand pen Yntymaq sý qoımalarynda jınaqtalǵan sýdyń kólemi 2017 jylǵy kórsetkishten asyp túsedi. Qar kúrt erip, sý qarqyndy kele bastaǵan jaǵdaıda sýdy apatty jaǵdaıda aǵyzýǵa týra keledi. Al bul ózeniń tómengi saǵasynda ornalasqan 44 eldi mekendi sý astynda qaldyrý qaýpin týdyrady», - dedi ol.
Mınıstrdiń atap ótýinshe, ekinshiden, eldi mekenderdi dalanyń erigen qar sýynan qorǵaýda da máseleler bar.
«Tek sońǵy jylda ǵana erigen qar sýynan 57 eldi meken zardap shekti. Qazirgi ýaqytta Aqmola, Almaty, Shyǵys Qazaqstan, Batys Qazaqstan, Qaraǵandy, Pavlodar, Soltústik Qazaqstan oblystaryndaǵy 160 eldi mekendi erigen qar sýynyń basý qaýpi saqtalyp otyr. Jergilikti atqarýshy organdar bul problemany sheshý úshin keshendi sharalar qarastyrýy tıis», - dedi Qasymov.
