Aýdan ákimi Saltanat Ábeýovanyń bastamasymen Aqtoǵaı jurty jerles aqyndarynyń «Altynkúrek» atty kitabyn shyǵaryp, atalmysh keshte jańa jınaqtyń tusaýyn kesti. Elbasynyń «Bolashaqqa baǵdar: rýhanı jańǵyrý» maqalasynda aıtylatyn sanadaǵy rýhtyń túleýi, jadydaǵy jazýdyń jańǵyrýy osyndaı keshterde oıǵa oralady. Aqynnyń mereıtoıyna Almaty men Astanadan, Qaraǵandydan aqyn-jazýshylar, belgili óner adamdary keldi. «Toqyraýyn tolqyndary» ansambli bastaǵan bir top ánshiler de óleń keshiniń ózegine aınaldy. Salıqaly sóz ben salmaqty saz jarasym tapqan jaqsy jıynda jyr oqylyp, jan jadyrady. Baǵdat Múbarak búginde qazaq poezııasynyń qadamy bólek qalamgeri bolyp qaldy. Oǵan aqynnyń ozyq óleńderindegi obrazdy oılaý úlgisi men mazmun tereńdegi, forma erendigi kýálik.
Keshtiń shymyldyǵyn aýdan ákimi S.Ábeýova men aqyn, jazýshy, respýblıkalyq «Qasym» jýrnalynyń bas redaktory S.Saǵyntaı túrip, kitaptyń tusaýyn kesti. Aýdan atynan aqynǵa erekshe syı-syıapat jasaldy.
Aqyndy aqyn ardaqtasa ol – delebe. Al, aqyndy ákim ardaqtasa – ol ónege. Osyndaı ónegeli isti oblys ákimi Erlan Qoshanov ta kórsetti. Qaraǵandy oblysy ákiminiń baspasóz hatshysy Dýlat Amanjol jetkizgen aq tilekten biz osyny ańǵardyq.
Erekshe aıtatyn jaıt, Baǵdat aqynnyń keshine «Toqyraýyn tolqyndaryn» kúımeli án kerýeniniń aqbas býrasy Amantaı Jumashev alyp shyǵýy ǵoı. Sondaı-aq, keshtiń qadirli qonaqtarynyń qatarynda talantty akter Keńes Nurlanov, belgili ánshi Roza Álqojanyń da bolýy halyqtyń erekshe yqylasyn týdyrmaı qoımaǵany anyq. Keshtiń keleli sózin aıtqan aqynnyń aǵasy, ólketanýshy Tuńǵyshbaı Muqan da qazaq poezııasyna ózindik qoltańbasymen kelgen aqyn jyrlarynyń erekshelikteri men ózindik ózgeshe bitim-bolmysyn áserli baıandady.
Jyr kóshiniń jalaýyn jelbiretip jetken Dáýren Berikqajy men Tanakóz Tolqynqyzy bastaǵan aqyndar ónerli ólkede óleń oqyp, Erlan Qujymanov, Qurmash Ybyshev, Erjan Bazarbekov, Dáýrenbek Árkenov syndy ánshiler sahnanyń sánin keltirdi.
Aqynnyń óleńine jazylǵan estradalyq ánderdi E.Serkebaev, N.Klım oryndady.
R.S. Altynkúrek – alǵash kóktemde jelpıtin jyly lep, maıda samal. Alaıda ol sonshalyq názik bolmysymen-aq qasarysyp jatqan qasat qardyń kóbesin sógip, kóktemniń alǵashqy báısheshek-taǵdyryna jol ashady. Poezııa, demek týra osy altynkúrek. Ol da adamzat jaralǵaly beri onyń júregindegi endi qaıta jibimesteı bolyp bekigen sher-shemendi bir názik sáýle-sóz arqyly jibitip keledi...
Mıras ASAN,
«Egemen Qazaqstan»
