Dóńgelek ústel formatynda uıymdastyrylǵan basqosýǵa respýblıkalyq ǵylymı-praktıkalyq ortalyq basshylary, «О́rleý» biliktilikti arttyrý Ulttyq ortalyǵynyń mamandary men joǵary oqý oryndarynyń professor-oqytýshylary qatysty.
Qazaq memlekettik qyzdar pedagogıkalyq ýnıversıtetiniń oqý jáne tárbıe isteri jónindegi prorektory Abaı Qurmanqulov rektor Gaýhar Aldambergenovanyń sharaǵa qatysýshylarǵa joldaǵan quttyqtaý hatyn oqyp berdi.
– Qazaqstanda pedagogıkalyq kadrlardyń qalyń shoǵyryn daıyndaýǵa súbeli úles qosyp kele jatqan ulaǵat uıasy – Qazaq memlekettik qyzdar pedagogıkalyq ýnıversıtetine qosh kelipsizder! Elimiz órkenıetke qaraı ónegeli jolmen damýdyń jańa ónerkásiptik kezeńine qadam basty. Bul Qazaqstan Prezıdenti Nursultan Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty bıylǵy Joldaýyna basty arqaý boldy. Elbasy jarııalaǵan basymdyqtar men mindetter Qazaqstannyń áleýmettik-ekonomıkalyq jáne tehnologııalyq turǵyda jańǵyrtýdyń logıkalyq jalǵasy ispettes. Joldaýda bizdi bilim berýdiń jańa sapasyna kóteretin jańǵyrýdyń negizi retindegi adam kapıtaly bolatynyn atap kórsetedi. Adamı kapıtaldyń sapasyn arttyrý – memleket damýyn qamtamasyz etýdiń negizgi alǵysharty. Qoǵamnyń zııatkerlik áleýetin ilgeriletýdi júzege asyrý pedagog kadrlarǵa tikeleı baılanysty. Otandyq joǵary oqý oryndary oı-órisi damyǵan, talantty, zerdeli jáne ultjandy ustaz daıyndaýdy odan ármen jańa deńgeıge kótere túsý qajet. Osy oraıda búgingideı jıyndardyń mańyzy aıryqsha ekenin atap ótkim keledi, – delingen quttyqtaý hatta.
Jıyn barysynda «Mektepke deıingi balalyq shaq» Respýblıkalyq ortalyǵynyń dırektory Bıjan Igembaev, Aqparattyq taldaý ortalyǵy Aksıonerlik Qoǵamy prezıdentiniń orynbasary Eldos Nurlanov, Qazaq memlekettik qyzdar pedagogıkalyq ýnıversıtetiniń Pedagogıka jáne psıhologııa fakýltetiniń dekany Saıra Jıenbaeva, «Erkem-aı» balabaqshasy men «Dana» mektebiniń quryltaıshysy, Mektepke deıingi tárbıe men bilim berý uıymdarynyń Almaty qalasy men Almaty oblysy boıynsha qaýymdastyǵynyń tóraıymy Kúlánda Batyrbekova jáne Almaty qalasy, Jetisý aýdanyndaǵy №51 bóbekjaı-balabaqshasynyń meńgerýshisi Farıda Omarbekova taqyrypqa baılanysty baıandama jasady.
Dóńgelek ústelde sóz alǵandardyń aıtýynsha, qazirgi kúnde mektepke deıingi uıymdardaǵy pedagog mamandarǵa degen suranys 22 myń 400 adamdy qurap otyr.
– Qyzdar Ýnıversıteti «Mektepke deıingi oqytý jáne tárbıeleý» mamandyǵy boıynsha bakalavr, magıstratýra jáne doktorantýra deńgeıleri boıynsha maman daıarlaıdy. Búgingi stýdent erteńgi maman ekenin eskersek, elimizdiń órkenıetke bastar joldyń bastaýy – mektepke deıingi uıym jáne onyń basty tulǵasy pedagogtarǵa jańa talaptar qoıylýda. Sebebi, qazirgi ınnovasııalyq baǵyttaǵy mektepke deıingi uıym pedagogi tıýtor rólin atqaryp, damyǵan ortada ómir súrýge qabiletti, ózin-ózi damytýǵa, óz oıyn erkin aıtatyn, shyǵarmashyl tulǵany tárbıeleı alatyn pedagogıkalyq quzirettiligi bolýy shart, – deıdi Pedagogıka jáne psıhologııa fakýltetiniń dekany Saıra Jıenbaeva.
Onyń aıtýynsha, búginde ýnıversıtette «Mektepke deıingi uıym menedjeri» qosymsha bilim berý baǵdarlamasy boıynsha 3 aılyq kýrstan mamandandyrý júrgizilýde. Sonymen qatar, oqý ornynda mektepke deıingi uıym tárbıeshilerine, ádiskerlerine, joǵary oqý oryndary oqytýshylaryna arnalǵan eń qajetti, úlken suranysqa ıe joǵary ınnovasııalyq baǵyttaǵy biliktilikti kóterý kýrstary ashylýda.
Bolashaqta Qyzdar Ýnıversıtetiniń janynan zamanǵa saı balabaqsha ashyp, onda dýaldyq bilim berý elementterin engizýdi jalǵastyrylmaq. Sondaı-aq, aldaǵy ýaqytta «Mektepke deıingi oqytý jáne tárbıeleý», «Bastaýysh mektepte oqytýdyń pedagogıkasy men ádistemesi» mamandyqtary boıynsha aǵylshyn tilinde daıarlaıtyn pedagogıkalyq kolledj ashý josparlanyp otyr. Atalǵan mamandyqtar boıynsha doktorantýra jáne dıssertasııalyq keńes ashý da josparda bar.
Jıyn aıasynda Qazaq memlekettik qyzdar pedagogıkalyq ýnıversıtetiniń professor-oqytýshylarynyń ǵylymı eńbekterine arnalǵan kitap kórmesi kópshilik nazaryna usynyldy.
