...rızashylyǵyn bildiredi
Muǵalimderdiń jaǵdaıy jaqsarmaq
Memleket basshysy Qazaqstan halqyna arnalǵan Joldaýynda densaýlyq saqtaý salasyndaǵy qyzmetkerlerdiń jalaqysy 28 paıyzǵa deıin, bilim berý salasy qyzmetkerleriniń jalaqysy 29 paıyzǵa deıin, áleýmettik qorǵaý salasy qyzmetkerleriniń jalaqysy 40 paıyzǵa deıin, «B» korpýsyndaǵy memlekettik qyzmetshilerdiń jalaqysy 30 paıyzǵa, stıpendııalar 25 paıyzǵa óskenin aıtty. «Daǵdarys zamany. Áıtse de, álemniń sanaýly ǵana elderi áleýmettik salaǵa jumsaıtyn shyǵyndaryn osylaı arttyra aldy. Respýblıkalyq bıýdjettiń áleýmettik salaǵa bólingen shyǵyny 2018 jyly 12 paıyzǵa ósip, 4,1 trıllıon teńgeden asty. Áleýmettik tólemderdi, sonyń ishinde zeınetaqyny ósirý 3 mıllıonnan astam qazaqstandyqtyń tabysyn kóbeıtedi. 2018 jyldyń 1 qańtarynan bastap yntymaqty zeınetaqy 8 paıyzǵa artty», dedi Elbasy.
Memleket basshysy muǵalim mártebesin arttyrý maqsatymen bilim berýdiń jańartylǵan mazmunyna kóshken ustazdardyń laýazymdyq jalaqysyn 2018 jyly 30 paıyzǵa kóbeıtýdi tapsyrdy. «Jańartylǵan mazmun degenimiz – halyqaralyq standarttarǵa saı keletin jáne Nazarbaev zııatkerlik mektepterinde beıimdelýden ótken zamanaýı oqý baǵdarlamalary. Bular bizdiń balalarymyzǵa qajetti fýnksııalyq saýattylyq pen synı turǵydan oılaý qabiletin darytady», dedi Nursultan Nazarbaev. Iаǵnı bıyl kategorııalar arasyndaǵy alshaqtyq aıqyndalyp, muǵalimder úshin biliktilik deńgeıin eskeretin kategorııalardyń jańa kestesi engiziledi.
Jalpy, Prezıdentimiz bilim salasyna qashanda erekshe nazar aýdaryp keledi. О́tken 2017 jyly Ońtústik Qazaqstan oblysynda 34 mekteptiń paıdalanýǵa berilýi sózimizdiń dáleli.
Roza PAK,
№45 mektep-gımnazııanyń dırektory
ShYMKENT
...kómek kútedi
Aýyz sý máselesi qashan sheshiledi?
Bizdiń Qarasý aýyly aq tarynyń atasy Shyǵanaq Bersıevtiń kindik qany tamǵan jer. Osy topyraqta ol otyzynshy jyldardyń aıaǵy men qyrqynshy jyldardyń alǵashqy jartysynda tary ósirýden álemdik rekord jasaǵan. Aıtaıyn degenim, ata dańqy men ataǵy shyqqan aýylda aýyzsý máselesi kópten beri sheshimin tappaı keledi. Ras, aýylymyzdyń aýmaǵy jerasty sý kózderine baı. Ári sý tym tereńde de emes, qudyq qazsań on shaqty kúrek oıymnan keıin móltildep shyǵa keledi.
Átteń shirkin, ne kerek, bir ókinishtisi jerdiń sýy ashy. Malǵa ishýge jaraǵanymen, ony turǵyndar shaı iship, as qamdaýǵa paıdalana almaıdy. Sondyqtan da aýyl adamdarynyń kópshiligi ony Qarasýdan 11 shaqyrym qashyqtyqta ornalasqan Qaratal dep atalǵan eldi mekennen tasyp ishedi. Biri bıdon, biri bóshke degendeı, árkim ony qoldarynda bar ydyspen tasymaldap jetkizedi. Mundaı jaǵdaıda sanıtarlyq tazalyq týraly sóz qozǵaýdyń ózi artyq. Búgingi kúni qarasýlyqtardyń oı-tilegi bireý ǵana – aýyldastarymyz aýyzsýǵa qaryq bolatyn kún qashan keler eken dep kútip júr.
Sansyzbaı MOLDAǴULOV
Aqtóbe oblysy,
Oıyl aýdany,
Qarasý aýyly
...jaqsylyǵyn jetkizedi
Balalar – sheksiz álemde
Ońtústik Qazaqstan oblysynda «Rýhanı jańǵyrý» baǵdarlamasy aıasynda oblystyq bilim basqarmasynyń uıymdastyrýymen respýblıkalyq «Qazaqstan balalary – sheksiz álemde!» shyǵarmashylyq kınofestıvali uıymdastyryldy. Basqosý – qazaq kıno óneriniń damýyn jáne shoqtyǵynyń bıiktigin aıǵaqtaıtyn, jasóspirimder arasyndaǵy úzdik klassıkalyq óner úlgilerin, daryndylardy anyqtaý, ondaǵy jasóspirimderdiń ózindik orny men alar úlesinen habardar etetin respýblıkalyq deńgeıdegi oqýshylar arasynda tuńǵysh ret uıymdastyrylǵan is-shara.
Shymkent qalasyndaǵy «Jastar resýrstyq ortalyǵynda» dúrkirep ótken sharaǵa Astana, Almaty qalalary men elimizdiń barlyq óńirlerinen balalar jınaldy.
Kınofestıval barysynda qatysýshy jasóspirimderdiń «Derekti kıno», «Oıyndy kıno», «STOP-MOTION-vıdeo», «Áleýmettik jarnama, áleýmettik rolık», «Anımasııa», «Vıdeo-art» jáne «Mýzykalyq fılm» nomınasııalary boıynsha shyǵarmashylyǵyna saraptama jasaý úshin kıno salasynyń kásibı mamandary belsendilikpen jumys jasap, qorytyndysy boıynsha júldegerler marapattaldy. Júldeli oryn ıelerine ár atalym boıynsha oblystyq bilim basqarmasynyń I, II jáne III dárejeli dıplomdary men arnaıy syılyqtar tapsyryldy. Al barlyq atalymdar boıynsha jalpy komandalyq esepte I orynǵa – Astana qalasy, II orynǵa – Ońtústik Qazaqstan jáne III orynǵa Almaty qalasy qol jetkizdi.
B.EShENQULOV,
Mektep olımpıadalaryn ótkizý ortalyǵynyń dırektory
Ońtústik Qazaqstan oblysy
…alǵys aıtady
Jańa mektepke el rıza
Byltyr Almaty oblysynyń Eńbekshiqazaq aýdanyna qarasty Esik qalasynda 600 oryndyq jańa mektep paıdalanýǵa berilgen bolatyn. Sharaǵa oblys ákimi Amandyq Batalov qatysyp, oqýshylardy, olardyń ata-analary men ustazdardy qýanyshty sátterimen quttyqtaǵan edi.
Eske salar bolsaq, qurylys jumystaryn «Jóndeý qurylys» JShS júrgizdi. Jobanyń jalpy smetalyq quny 1,4 mlrd teńgeni qurapty. Mektep eki qabatty, 600 oqýshyǵa arnalǵan. Mektepte qajetti jabdyqtarmen qamtamasyz etilgen fızıka, hımııa kabınetteri, akt jáne sport zaldary, ashana, mýltımedııaly-lıngafondyq jáne basqa da kabınetter qarastyrylǵan. Balalardyń bilim alýyna osyndaı jaǵdaı jasalynyp otyrylǵanyna el-jurt árkez alǵystaryn bildirýde.
Samal QABYShEVA
Almaty oblysy
...áserimen bólisedi
Úılenip, otbasyn qurǵan jón eken
Úılenip, turmys qurǵan jón eken... Tapqanyńdy úıińe tasısyń. Boıdaq kezde aqsha tússe kafe, restoran, týǵan kún dep qurtsań, úılengen soń bir tıyn shyǵyn shyǵarmaýǵa tyrysasyń. Tipti joldan ıne taýyp alsań da, ári aýdaryp, beri aýdaryp qarap, sabaqtaýly jibimen túspegen eken-aý dep qaltańa súńgitesiń. Qyzdar da solaı. Boıdaq kezde týsh, lak, makııaj, shash jasatý dep aqshany sýdaı shashady. Aptasyna alty ret sulýlyq salony, dıskoteka. Túske deıin úsh kóılek, tústen keıin tórt kóılek aýystyryp shyǵynǵa batady. Turmysqa shyqty – rahat. Aqsha, as-sý, kıim keshek, júrip turý aqysyn qamtamasyz etetin adamy bar. Meıram saıyn qushaq-qushaq gúl, syılyq. Ekeýi ǵana biletin qupııa nárseler bolady arasynda. Erkekterdi aıtsaıshy, solardiki rahat. Ystyq tamaq, murnyń terlep otyryp tamaqtanasyń... Aıtarym – erterek juptaryńdy taýyp otaý tigińder. Urys-keris degen beker áńgime. Úı bolǵan soń ydys-aıaq syńǵyrlap turady. Syńǵyrlasa syńǵyrlaı bersin, saqyrlap ketpese boldy.
Muhıt TASTAN
