Fılm jelisine Ulttyq ulannyń sarbazy Erbol Otarbaevtyń 2010 jylǵy 22 maýsymda Aqtaý qalasyndaǵy túzetý mekemesinde qaraýyl qyzmetin atqaryp turǵan kezdegi janqııarlyq erligi arqaý bolǵan. Uıymdastyrýshylardyń aıtýynsha, bul týyndy – lańkestik pen ekstremızmniń, radıkaldy aǵymdardyń aldyn alýǵa shaqyratyn qural.
Tusaýkeserge depýtattar, kúshtik qurylymdardyń, ákimdiktiń jáne buqaralyq aqparat quraldarynyń ókilderi, Ulttyq ulan ardagerleri, akterlar qatysty. Ulttyq ulannyń bas qolbasshysy Rýslan Jaqsylyqov shara aldyndaǵy baspasóz máslıhatynda Erboldyń erligi jastarǵa úlgi bolýy tıis ekenin atap kórsetti.
«Erlik jasaǵan kezde Erbol Otarbaev nebári 19 jasta edi. Erboldy úlgi ete otyryp, búgingi jas urpaqty tárbıeleýimiz kerek. О́z basym osynaý erlikke nazaryn aýdarǵandarǵa alǵysymdy bildiremin. Sebebi jaýyngerlerimizdiń batyrlyǵyn kóp jaǵdaıda umytyp ketemiz. Bizdiń jigitterdiń erligi jas urpaqqa úlgi bolýy kerek», dedi R.Jaqsylyqov.
Erligi fılmge arqaý bolǵan Erbol áli kúnge deıin sol oqıǵa esinde ekenin aıtady.
«Mundaı jaǵdaıdy ómir boıy umytý múmkin emes shyǵar. Ulttyq ulannyń kez kelgen sarbazy osyndaı oqıǵaǵa kezikkende eshqashan artqa sheginbeıdi, shegingen de emes. Sol kezde bar oıym sottalǵan azamattardy toqtatý boldy. Maqsatym batyr ataný emes bolatyn. Mindetimdi atqaryp júrgen áskerı bólimdi, rotany, vzvodty, áke-sheshemdi, aýylymdy jerge qaratqym kelgen joq», dedi bas keıipker.
Kórkem týyndydaǵy basty rólderdi Sanurjan Súleımenov, Jasulan О́mirbek, Saıat Isembaev sekildi elimizge tanymal akterlar somdady. Muhametqalı Satovtyń ıdeıasymen túsirilgen týyndynyń bas prodıýsseri Danııar Ibragımov, rejısseri Serikbolsyn О́tepbergenov. Kınokartınany Aqparat jáne kommýnıkasııalar mınıstrliginiń tapsyrysy boıynsha «Aıý sınema» kınokompanııasy men«Habar» agenttigi birlese otyryp túsirgen.
Esterińizde bolsa, sol kezde jas jaýynger túrmeden qashpaq bolǵan 21 jazasyn óteýshiniń jolyna jalǵyz ózi tosqaýyl qoıǵan bolatyn. Osy erligi úshin E.Otarbaev II dárejeli «Aıbyn» ordenimen marapattaldy. Qazirgi tańda ol – Ulttyq ulannyń ofıseri.
Abaı ASANKELDIULY,
«Egemen Qazaqstan»
