Munyń barlyǵy Baıan sulý degen ardaqty atty alyp júrgen qostanaılyq kondıter fabrıkasynyń da ókilderin oılantqan kórinedi. Nátıjesinde, Almatyda baspasóz máslıhaty uıymdastyrylyp, halyqtyq daýys berý arqyly eń úzdik Baıan sulý beınesin tańdaý sharasy bastalǵany málim boldy. «BAYAN SULU-2018» halyqtyq beıne – halyq tańdaýy» atty bastamanyń qorytyndysy 15 sáýirde, ıaǵnı Ulttyq ǵashyqtar kúninde belgili bolmaq.
Uıymdastyrýshylardyń aıtýynsha, bul jaǵdaı – qazaq halqynyń osy tusta óz oıyn bildirgisi kelgendiginiń aıqyn mysaly jáne halyqtyń súıikti keıipkerin tańdaýǵa qatysýǵa nıetti ekenin anyq ańǵartady.
– Biz ózimizdiń tól mereke – «Qozy Kórpesh – Baıan sulý» Ǵashyqtar kúniniń keń nasıhattalýyn qoldaımyz. Sondyqtan ashyq daýys berý oryndy. Ári bul – ótken dástúrimiz ben ulttyq negizimizdi ulyqtaý, – dedi «Aıqyn» gazetiniń bas redaktory Nurtóre Júsip.
Qostanaılyq «Baıan sulý» kondıterlik fabrıkasynyń ókili jáne uıymdastyrý komıtetiniń tóraǵasy Marlen Abylǵazınov: «Biz qoǵamymyzda shynaıy Baıan sulý beınesin dáripteıtin túsinikti tolyq qalyptastyrýǵa úles qossaq deımiz», deıdi.
Sonymen saıysqa qatysý úshin 18 jáne 35 jas aralyǵyndaǵy qyz-kelinshekter www.halykbayansulu.kz saıtyndaǵy anketany toltyryp, óz fotosy jáne beıne-aqparatty júkteýi kerek eken. Beınetaspadaǵy bıkesh Baıan sulý kelbetin jáne osy beıneni somdaýǵa nege ózi laıyqty ekendigin baıandaýy tıis. Saıys bıyl 15 aqpan men 31 naýryz aralyǵynda ótedi. Osy kezeńde ınternet qoldanýshylar óz daýystaryn bere alady.
Halyqtyń daýys berý nátıjesiniń negizinde aqtyq synǵa 5 arý ótkizilmek. Ádilqazylar alqasynyń sheshimimen bes qatysýshynyń arasynan bir jeńimpaz anyqtalyp, Bas júldege tigilgen kóliktiń kiltine ıe bolmaq.
Saıystaǵy ádilqazylar alqasy quramyn qoǵam qaıratkerleri, mádenıet jáne BAQ ókilderi, sondaı-aq tanymal blogerler men medıa-tulǵalar quraıdy.
Aınash ESALI,
«Egemen Qazaqstan»
ALMATY
