– Biz úshin de, jas Qazaqstan memleketi úshin de ol jyldar sanadan óshpesteı iz qaldyrǵan, esh umytylmas tarıhı kezeńder bolyp sanalady. Áli esimde, shaǵyn ǵana ofıste meniń bir kómekshim jáne barlyǵyn qosqanda 5-aq adam otyrýshy edik, – degen Naıdjel Rıngroýz táýelsizdik shapaǵymen nurlanǵan qazaq halqynyń qýanyshyn kóre júrip, birge qýanyp, qýattaı otyryp, ózderiniń de qajyrly ister atqarǵanyn aıtyp berdi. – О́ıtkeni bizdiń BUU talaptaryna sáıkes alǵa qoıǵan maqsatymyz zor boldy. Qazaqstan Úkimeti bizdi jatsynbaı, kómek qolyn sozdy. Eń aldymen bizdi qoldap Almatyǵa IýNISEF uıymy keldi. Sodan soń álemdik bank óz fılıalyn ashty. Búgingi Qazaqstan dál sol bir jyldardaǵy kezdesken alǵashqy qıyndyqtardy múldem basynan ótkermegendeı, tipti, aınalyp ótkendeı kórinedi maǵan. Búgin biz osynda Qazaqstan Prezıdenti Nursultan Nazarbaevtyń árbir qadamyn erekshe atap, jemisti bolashaqty kózdegeniniń birden-bir kýási bolyp otyrmyz.
Ol kezdegi Almatydaǵy birden-bir kórikti ǵımarat «Qazaqstan» qonaqúıi bolǵany da aqıqat. Qazaqstandaǵy eń bıik meımanhanada ashylǵan BUU ofısiniń qyzmeti men elmen yntymaqtastyq jolyndaǵy ıgilikti isi sol kezeńnen bastap toqtaýsyz jalǵasty. Búgingi 25 jyldyqqa oraı ótken saltanatty jıynnyń «Qazaqstan – BUU: tájirıbe, jetistikter men yntymaqtastyqtyń keleshegi» atalýy da sondyqtan. Saltanatty jıynǵa arnaıy qatysqan Qazaqstan Syrtqy ister mınıstri Qaırat Ábdirahmanov Birikken Ulttar Uıymyna qosylǵan kezden bastap Qazaqstan uıymnyń belsendi múshesi ári senimdi serigi bolǵanyn atap ótti.
– BUU organdary men baǵdarlamalary Qazaqstannyń áleýmettik-ekonomıkalyq damýyna eleýli úles qosyp, bul dástúrdi kúni búgin odan ári jalǵastyrýda. Sonymen birge BUU bizdiń elimizge burynǵy Semeı ıadrolyq polıgonyn saýyqtyrý, Aral teńizin qalpyna keltirý sekildi mańyzdy jobalar aıasynda tehnıkalyq jáne qarjylyq kómek kórsetti, – dedi mınıstr.
Qazaqstanda BUU-nyń alǵashqy ofısi ashylýynyń 25 jyldyǵymen quttyqtaýshylar táýelsizdik besigi atanǵan Almaty qalasynyń búginde aıryqsha mártebege qol jetkizgeni týraly aıtyp ótýdi de umytpady. О́tken jyly Almatynyń 1000 jyldyǵy IýNESKO-nyń aıtýly oqıǵalar kúntizbesine endi, megapolıs osy uıymnyń kreatıvti qalalar júıesine qosyldy.
Quttyqtaýshylar lebizin jalǵaǵan Almaty qalasynyń ákimi Baýyrjan Baıbek óz sózinde EYDU standarttaryna saı shaharda «Almaty-2020» damý baǵdarlamasynyń belsendi túrde qolǵa alynǵanyn, sonymen qatar batystyq standart boıynsha ashyq, jaıly ári qolaıly keńistik qalyptastyrý barysynda júıeli oń ózgeristerdiń júrip jatqanyn atap ótti.
– Bıznesti jeńil júrgizý men ınvestısııa tartý úshin qalamyzda barlyq jaǵdaılar jasalýda. BUU-nyń damý baǵdarlamasymen birge «Turaqty kólik» jobasy Almatyda oıdaǵydaı júzege asýda, búgingi Almatyda elimizdegi birikken kásiporyndardyń 40 paıyzy jumys isteıdi jáne halyqaralyq uıymdar men transulttyq kompanııalardyń 60-tan astam ofısi ashylǵan. Uıymnyń Qazaqstandaǵy qyzmetiniń 25 jyldyǵy barysynda BUU-nyń óńirlik habyn kúzde ashýdyń josparlanýy Qazaqstanmen seriktestiktiń jańa tarıhı jeńisi bolatyndyǵy sózsiz, – dedi qala ákimi.
Aıtýly sharaǵa Qazaqstan BUU janyndaǵy alǵashqy turaqty ókili, burynǵy Qazaqstan Syrtqy ister mınıstri, arnaıy maqsattaǵy elshi, professor Aqmaral Arystanbekova qatysyp sóz sóıledi. «Qazaqstan BUU-men yntymaqtastyqta joǵary deńgeıge qol jetkizdi. Prezıdent Nursultan Nazarbaevtyń antıterrorlyq koalısııa qurý bastamasy álem úshin óte mańyzdy, óıtkeni Qazaqstanda terrorızmge oryn joq. Qazaqstannyń qarýsyzdaný jáne ıadrolyq qarýdy taratpaý jónindegi álemdegi róli óte joǵary. Beıbitshilikti qalaıtyn barlyq álem jurtshylyǵy úshin mańyzdysy – Qazaqstannyń osynaý beıbit qadamy», dedi Aqmaral Arystanbekova.
Saltanatty jıynǵa BUU-nyń Ortalyq Azııa boıynsha bas hatshysynyń arnaıy ókili Natalıa German, BUU-nyń úılestirýshi-rezıdenti Norımasa Shımomýra, BUU-nyń ókilderi, Almatydaǵy QHR, AQSh, Reseı jáne Fransııa elderiniń konsýldary, qoǵamdyq uıymdardyń belsendileri, stýdentter qatysty.
Talǵat SÚIINBAI,
«Egemen Qazaqstan»
ALMATY
