Mundaı shara Batys Qazaqstan oblysynda tuńǵysh ret uıymdastyrylyp otyr. Sharaǵa Qazaqstannyń ár óńirinen – Atyraý, Mańǵystaý, Aqmola, Almaty, Jambyl, Kókshetaý, Qaraǵandy oblystarynan, Astana men Almaty qalasynan jıyrma shaqty qusbegi qatysýda. Bir qyzyǵy, irgede ótip jatqan dýmannan qalǵysy kelmeı, Reseıdiń kórshiles Samara, Tolıattı, Ýlıanovsk qalalarynan qarshyǵa men ıtelgi baptap júrgen qusbegiler de jolǵa shyqqan eken. Qyzyl kitapqa engen qustaryn shekaradan ótkizbeı, tek ózderi kelýge májbúr bolǵan. Sheteldik qonaqtar Oraldaǵy qusbegiler saıysynyń uıymdastyrylýyna, el-jurttyń yqylasyna erekshe qyzyǵýshylyqpen qarap júrdi.
- Osyndaı týrnır byltyr Mańǵystaý men Atyraý oblysynda ótti. Bıylǵy shara Batys Qazaqstan oblysy basshylyǵynyń qoldaýymen ótip otyr. Muny qusbegilik dástúrdiń elimizdiń batys óńirinde qaıta jandanýy dep aıtýǵa bolady. Oraldaǵy Ulttyq sport mektebi janynan qusbegilik bólimi ashylady dep senemiz,-dedi Qazaqstan Respýblıkasy Ulttyq sport túrleri qaýymdastyǵynyń I vıse-prezıdenti Erlen Ospanov.
- Zań boıynsha aqpannyń 15-sinen keıin ań aýlaýǵa tyıym salynady. Sondyqtan biz bul saıysta qyran qustardy ańǵa salmaımyz, qusbegiler qusty qolǵa shaqyrý, ushyrý, shyrǵa salýdan synǵa túsedi. - deıdi ulttyq sport túrlerinen memlekettik jattyqtyrýshy Ramazan Sáttibaev.
Saıystyń alǵashqy kúni tańerteń aýa temperatýrasy 20 gradýstan tómen boldy. Biraq kúnniń salqyndyǵyna qaramastan ólkede tuńǵysh ret ótip jatqan erekshe merekeni tamashalaýǵa halyq kóp jınaldy. Aıta ketý kerek, uıymdastyrýshylar baryn salǵan: jeltaýdyń basynda birneshe kıiz úı tigilgen, ystyq tamaq usynǵan saýda oryndary qyzmet kórsetip jatyr, kelýshilerdiń kóligin qoıatyn avtoturaq daıyndalyp, JPQ qyzmetkeriniń jiti baqylaýymen qaýipsizdik qamtamasyz etilgen. Tótenshelikter arnaıy shatyr tigip, ishine jylý júrgizip qoıypty. Sýyqtan tońǵan balalar men úlkender shatyrǵa kirip, jylynyp alady. Batys Qazaqstan oblystyq tarıhı-ólketaný mýzeıi de arnaıy kıiz úı tigip, mýzeı qoryndaǵy qazaqy saıatshylyqqa qatysty 30-dan asa jádigerdi kópshilik nazaryna usynǵan. Ǵarıfolla Qurmanǵalıev atyndaǵy Batys Qazaqstan oblystyq fılarmonııasynyń janynan qurylǵan «Oral sazy» ansambli de sharanyń saltanatty ashylýyna oraı sahnaǵa shyǵyp, saýsaqtan jan ketirgen sýyqqa qaramastan óner kórsetti. Oral qalasy shetindegi «Medkolledj» aıaldamasynan Jeltaý bıigine deıin avtobýs tasymalyn tegin uıymdastyrǵan qalalyq jolaýshylar tasymaly qyzmetine de el-jurt alǵys aıtyp jatyr.
Jalpy, bul sharany negizgi uıymdastyrýshy – Batys Qazaqstan oblystyq sport basqarmasy bolǵanymen, óńirdegi týrızm jáne syrtqy baılanystar basqarmasy, «Atameken» Ulttyq kásipkerler palatasynyń óńirlik fılıaly, qoǵamdyq uıymdar men jekelegen belsendi azamattar qusbegiler saıysynyń jalpyhalyqtyń merekege aınalýyna kóp úles qosty. Jan-jaqty jarnama men nasıhattyń nátıjesinde bul sharany kórý úshin Reseı Federasııasynyń Astrahan, Saratov, Samara, Orynbor óńirlerinen, Qazaqstannyń ózge oblystarynan arnaıy týrıster kelgen.
- Uıymdastyrý komıtetine habarlasyp, Oraldaǵy «Qansonar-2018» týrnırin tamashalaýǵa tilek bildirgen týrısterge barynsha qoldaý kórsettik. Olar «Evrazııa» týrızm ortalyǵyna ornalasty, Oral qalasynyń tarıhymen tanystyratyn ekskýrsııalar uıymdastyryldy. Jarys qonaqtary men týrıster alǵashqy kúni Oraldaǵy belgili kúıshi ári dombyra sheberi, respýblıkalyq «Altyn dombyra» baıqaýynyń birneshe márte júldegeri Edige Nábıevtiń sheberhanasynda bolyp, qazaqtyń ulttyq aspabyn jasaý óneriniń qyr-syryn tamashalasa, kelesi kúni belgili órimshi-sheber Ulan Saıtmuhaevtan qamshy órý dástúri týraly dáris tyńdady, - deıdi osy sharany uıymdastyrýshylardyń biri, «Ǵylymı zertteýlerdi qoldaý qorynyń» dırektory Aıbolat Qurymbaev.
24 aqpan kúni qusbegiler irikteý kezeńinen ótti. Erteń respýblıkalyq saıystyń aqtyq báseke-fınaly ótedi. Aıta keteıik, «Qansonar-2018» respýblıkalyq qusbegiler týrnıriniń 200 myń teńgelik bas júldesin oraldyq kásipker-mesenat, «Saıat» etno-týrıstik ortalyǵynyń quryltaıshysy Murat Jákibaev tikken.
Qazbek QUTTYMURATULY
«Egemen Qazaqstan»
Batys Qazaqstan
Sýretti túsirgen Temirbolat Toqmambetov
