Darıǵa Nazarbaeva Lı Kýan Iý baǵdarlamasy boıynsha Sıngapýrda boldy

Sıngapýr Premeri Lı Sıan Lýnmen kezdesý barysynda ekijaqty ynty­maqtas­tyqty damytýdyń, onyń ishinde «Nurly jol» baǵdarlamasy men «Bir beldeý, bir jol» bastamasynyń úılesim tabýy bo­ıynsha aýqymdy máseleleri talqylandy.

Senator Qazaqstannyń BUU Qaýip­siz­dik Keńesindegi tóraǵalyǵy týraly Premer Lıdi habardar etti. BUU Qaýipsizdik Keńesindegi alǵashqy ári basty shara Qazaqstan Prezıdenti N.Nazarbaevtyń tóraǵalyq etýimen ótken «Jappaı qyryp-joıý qarýlaryn taratpaý: senim sharalary» atty taqyryptyq brıfıng boldy. Sıngapýrǵa Ońtústik-Shyǵys Azııadaǵy ıadrolyq qarýsyz aımaq týraly shartqa qatysýshy memleketter men Ortalyq Azııadaǵy ıadrolyq qarýdan azat aımaq elderi arasyndaǵy yntymaqtastyqty údetýge baǵyttalatyn kún tártibin  birlese ilgeriletý usynyldy.

Qazaqstan Senaty komıtetiniń tór­aǵasy ASEAN uıymyna Sıngapýrdyń tóraǵalyq etýimen Lı Sıan Lýndy qut­tyq­tady jáne Assosıasııa men Eýra­zııa­­lyq ekonomıkalyq odaq arasyn­daǵy yntymaqtastyqty damytýdyń áleýetine nazar aýdardy.

Kórnekti saıasatker, Qurmetti aǵa mınıstr Go Chok Tongpen kezdesý barysynda saýda jáne bilim berý salasyndaǵy yntymaqtastyqty óristetýge basymdyq bere otyryp, ekijaqty qatynastardyń negizgi máseleleri talqylandy. Sıngapýr saıasatkeri «Qazaqstan Sıngapýrdyń Ortalyq Azııadaǵy iri saýda áriptesi bolyp tabylady», dedi jáne «Bir beldeý, bir jol» bastamasynyń zor áleýetine toqtala kelip, ony iske asyrýda eki eldiń de negizgi ról atqara alatynyn atap ótti.

D.Nazarbaeva Parlament Tóraǵasy Tan Chýan-Djınmen  parlamenttik baılanystardy nyǵaıtýdy talqylady jáne parlamentaralyq únqatysýdyń damytý qarqyny týraly aıta kelip, eki eldiń zań shyǵarý bıligi tarmaqtary bas­shy­larynyń 2016-2017 jyldardaǵy ózara saparlary parlamentaralyq baıla­nystarǵa eleýli serpin bergenin atap ótti.

Eki el arasyndaǵy syrtqy ekonomı­kalyq baılanystardy damytý, qaýip­sizdikti nyǵaıtý jáne qarýlardy taratpaý máseleleri Sıngapýr syrtqy ister meke­mesiniń basshysy Vıvıan Balakrısh­nanmen áńgimege arqaý boldy. 

V.Balakrıshnan Sıngapýrdyń ASEAN uıymyna tóraǵalyq etýdegi basym­dyqtary týraly áńgimelep berdi jáne Sıngapýr men Eýrazııalyq ekonomıkalyq odaq arasyndaǵy erkin saýda aımaǵyn qurý jónindegi máseleni ilgeriletýge qo­ldaý bildirgeni úshin Qazaqstanǵa alǵy­syn jetkize otyryp, «mundaı aıma­q­ty qurý eki el arasyndaǵy saýda-ekono­mıka­lyq jáne ınvestısııalyq yntymaq­tas­tyq­ty eleýli túrde kúsheıte túsedi», dep atap ótti.

Sharaǵa sonymen qatar Senattyń Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Asqar Beısenbaev ta qatysty.

«Egemen-aqparat»