Memlekettik-jekeshelik áriptestiktiń mańyzy zor

Senat komıtetiniń tóraǵasy Asqar Beısenbaev Prezıdent N.Á.Nazarbaevtyń Qazaqstan hal­qyna Joldaýynda memlekettik-jekeshelik áriptestik aıasynda mem­lekettik múlikti senimdi basqarý, qyzmet kórsetý sharttary jáne basqa da sıpattary boıynsha memle­kettik múlikti basqarýdyń túrlerin paıdalana otyryp jeke kapıtaldy ekonomıkaǵa tartý jóninde mindet qoıylǵanyn atap ótti. Bul rette kelisýdiń barlyq túrlerin, ásirese, shaǵyn jobalarǵa qatysty rásim­derdi meılinshe ońaılatý jáne jedeldetý kózdelip otyr. Mem­­lekettik-jekeshelik áriptestik ınfra­qurylymdy, onyń ishinde áleýmettik salany damytýdyń bas­ty tetigi bolýy tıis. Ol, sondaı-aq zamannyń ózgerýine baılanys­ty bizge memlekettik-jekeshelik salasyndaǵy árbir ınvestor úshin kúresýimiz kerek ekenin atap ótti.

Parlament Senaty Tóraǵasynyń orynbasary S.Gromov Qazaqstanda memlekettik-jekeshelik áriptes­tikti damytý úshin qajetti quqyq­tyq, ınstıtýttyq jáne ınfra­qury­lymdyq negiz jasalǵanyn jet­kizdi. 1991 jyly «Qazaqstan Res­­­pýb­­­lıkasyndaǵy konsessııalar týra­­ly» zań qabyldanyp, memle­ket­tik-jekeshelik áriptestiktiń zań­dy negizi jasaldy jáne 2015 jyly qabyl­danǵan «Memlekettik-je­ke­shelik áriptestik týraly» zańmen jetildirildi.

Senator Sársenbaı Eńsegenov memlekettik-jekeshelik áriptes­tikti damytýdaǵy menshikti qarjy­nyń jetkiliksizdigi, qol jetimdi qordyń bolmaýy, bank qaryzdary­nyń paıyzdyq mólsherlemesiniń joǵarylyǵy, qarjy ınstıtýttary belsendiliginiń tómendigi sekildi bir­qatar ózekti máselelerdi atap ótti.

Ulttyq ekonomıka mınıstri­niń birinshi orynbasary Rýslan Dá­lenov dóńgelek ústelge qatysýshy­­lar­dy elimizdegi memlekettik-jeke­shelik áriptestikti damytýdyń negizgi kórsetkishterimen tanystyr­dy. Búgingi tańda memlekettik-jekeshelik áriptestik salasynda 200 nysan boıynsha jalpy somasy 401,6 mlrd teńge bolatyn ınves­tısııaǵa 194 shart (298,4 mlrd teń­gege respýblıkalyq 6, 103,2 mlrd teńgege jergilikti deńgeıdegi 188) jasalǵanyn atap ótti.

Investısııalar jáne damý mı­nıstriniń orynbasary Arystan Qabykenovtiń aıtýynsha, mem­lekettik-jekeshelik áriptestik jó­nindegi birqatar iri jobalar júzege asýda. Olardyń ishinde quny 512 mlrd teńge bolatyn «Úlken Almaty aınalma avtomobıl jolynyń» qurylysy men paıdalanýǵa berý, «Almaty-Qorǵas» avtomobıl jolynyń bóliginde quny 98 mlrd teńgege baǵdarlanǵan «Nur joly» kólik ótkizý beketine ınfraqurylym jasaý da bar.

Densaýlyq saqtaý mınıstriniń orynbasary Lıazat Aqtaeva memle­kettik-jekemenshik áriptestik joba­larynyń tizimine qazirgi kezde 138, onyń ishinde 3 respýblıkalyq jáne 135 jergilikti mańyzy bar joba engenin habarlady.

Dóńgelek ústel otyrysy barysynda Parlament Senatynyń depýtattary memlekettik-jekeshelik áriptestikti tıimdi damytýǵa kedergi bolatyn máselelerdi sheshý joldaryn talqylady. Quqyqtyq, normatıvtik-quqyqtyq negizderdi jetildirý, qarjylandyrýdyń qo­sym­­sha kózderin tartý, nesıemen qoldaýdy qamtamasyz etý, valıý­talyq qaýipterge ótemaqy tóleý bıýdjetten tys qorlardyń rólin kúsheıtý, memlekettik kepildeme berý tetikterin qoldaný qajettigi jáne basqa máseleler atalyp ótildi.

Dóńgelek ústeldiń qory­tyn­dysy boıynsha usynymdar ázirlenip, el Úkimetine, jergilikti atqarý­shy organdar men basqa da múddeli organ­darǵa jiberiletin boldy jáne ol budan bylaıǵy zań shy­ǵarý jumystary barysynda depý­tattardyń nazarynda ustaý kózdelip otyr.