– Qaırat Orynbaıuly, bul qordy ne maqsatpen qurdyńyzdar jáne nemen aınalysady?
– «Ýaqyp» qory kommersııalyq emes qaıyrymdylyq kórsetetin uıym. Negizgi mıssııasy – jeke jáne zańdy tulǵalar tarapynan jınalǵan qarjymen qaıyrymdylyq jasap, áleýmettik jobalardy qoldaý. Maqsatymyz – az qamtylǵan otbasylarǵa materıaldyq kómek kórsetý, buqaranyń dinı saýatyn arttyrýǵa kómektesý, radıkalızm men dinı ekstremızmniń aldyn alý, dinı mekemeler men onyń qyzmetkerlerin qoldaý.
– Qor ótken jyldyń shilde aıynda tirkelipti. Sodan beri qandaı jumystar atqaryldy?
– Elimizdegi dinı qyzmetkerlerdi qoldaý qordyń basty baǵyty degendi jańa aıttyq. О́ıtkeni, dinı qyzmetkerler bıýdjetten aılyq almaıdy. Ásirese, shalǵaı aýyl ımamdary qarjyǵa muqtaj. Qor osy oraıda, alys aýyldarda turatyn 250 dinı qyzmetkerge, teris aǵymmen kúresýshi teologtarǵa jalpy somasy 31 mıllıon teńgelik áleýmettik kómek kórsetip, 90 dinı qyzmetkerdi ekstremızm men radıkalızmge qarsy biliktilik arttyrý kýrsyna jiberdi. Bul jumys áli de jalǵasyn tabady.
Bunyń syrtynda QMDB janyndaǵy ımamdardyń bilimin jetildirý ıslam ınstıtýtyna 16 mıllıon teńge kóleminde kómek kórsetildi. Aqtóbe qalasynyń meshitine «Hyundai Creta» jeńil kóligi berildi. Kedeı otbasylardan shyqqan bes stýdentke «Nur-Múbarak» ýnıversıtetinde bilim alý úshin qarjylaı kómek berildi.
Ulttyq sport túrlerin nasıhattaý maqsatynda ótken jyldyń qazan aıynda Jambyl oblysynyń Qordaı aýdanynda qazaq kúresinen, qarasha aıynda Ońtústik Qazaqstan oblysynda toǵyzqumalaqtan týrnır ótkizdik.
Jaqynda Qazaqstan Respýblıkasy Kásipodaqtar federasııasynyń tóraǵasy Baqytjan Ábdiraıymovpen kezdesip, Federasııa tarapynan din qyzmetkerlerine elimizdegi demalys oryndaryna jeńildikpen joldama berý máselesin sheshtik.
Kelesi bir atap ótýge turatyn dúnıe – qor bastamasymen jastardyń adamgershilik qabiletin arttyrýǵa baǵyttalǵan áleýmettik rolıkter ázirlenip, «Qaıran ómir» atty qysqa metrajdy fılm túsirdik. Osynyń jalǵasy retinde dástúrli ıslam qundylyqtaryn jáne ata-baba muralaryn nasıhattaýǵa arnalǵan tolyq metrajdy fılmniń túsirilimi júrip jatyr.
Elordalyqtar úshin jaǵymdy jańalyq: ótken jyly Astana qalasy Petrov kóshesinde ornalasqan «Sultan» saýda ortalyǵynda zeınetkerler men muqtaj jandarǵa sút pen nan tegin taratylǵan edi. Bul aksııa bıyl da jalǵasyn taýyp, ár aptanyń juma kúni saǵat 12:00-15:00 arasynda ótkizilýde.
– Siz adam qýanarlyq málimetter aıttyńyz. Qutty bolsyn! Qor arqyly qaıyrymdylyq jasaýǵa nıet etken azamattar bolsa qarjysyn qalaı aýdara alady?
– Qorǵa qarjyny aýdarýdyń birneshe joly bar. Áýeli «Qazaqstan halyq banki» AQ-ta ashylǵan esep-shotqa joldaı alady. Tıisti rekvızıtter qordyń resmı saıtynda (www.waqyp.kz) tur. Sonymen qatar qor kassasyna barlyq qoǵamdyq oryndarda ornalasqan QIWI termınaldary arqyly aýdarýǵa bolady. Munan bólek qordyń mobıldi qosymshasy jasalýda. Osy júıe arqyly onlaın rejimde aqsha aýdara alasyz.
– О́tken jyldyń sońynda qor Aqtóbe qalasyndaǵy kolledj-medrese qurylysyna qatysqany jaıly habardarmyz. Osy jobany iske asyrýda qandaı jumystar atqaryldy?
– Shyn máninde bul elimiz úshin óte qajet joba-tyn. Qala ákimdigi siz aıtyp otyrǵan bilim ordasynyń qurylysyna bes gektar jer bólip, qurylysyn 2020-2021 jyldarǵa qaraı aıaqtaý josparlanypty. Biraq kolledj-medrese Bilim jáne ǵylym mınıstrligi tarapynan bilim berý lısenzııasyn áldeqashan alǵan eken. Bizdiń qor bilim ordasy aýmaǵynda dinı qyzmetkerler men muqtaj jandarǵa arnap, tórt podezden quralǵan úı salmaqpyz. Jumys sátti júrip jatsa, mundaı jobalardy Astana jáne Almaty qalalary, Qyzylorda oblysynda iske asyrý josparlanyp otyr.
– Qordyń qarjylyq baqylaý tetigi qalaı oılastyrylǵan?
– Jumys barysynda qoldaǵy qarjyǵa turaqty túrde monıtorıng júrgizilip, qaıyrymdylyq sharalarynyń tıimdiligi jáne qarjynyń tıimdiligi baqylanyp otyrady. Bul jumysty qordyń menedjerleri óńirdegi din isteri basqarmalary jáne dinı birlestik ókilderimen birlesip júrgizedi.
Áńgimelesken
Beken QAIRATULY,
«Egemen Qazaqstan»
