Ákimniń ákelik qamqorlyǵy

Solardyń qatarynda Gúlim Núrkebaeva esimdi jas ana bar. Ol da qundaqtaýly balasyn kóterip, Taldyqorǵan qala­syndaǵy «Analar úıin» pana­laǵan edi. Gúlimniń basynan ótken oqıǵa jurtqa sabaq bolarlyqtaı. 12 jasynda anasynan aıyrylǵan jas qyz ákesin múldem kórmegen eken. Kishi sińlisin ertip qaladaǵy «Aınalaıyn» balalar úıiniń tabaldyryǵyn attaıdy. Osy jerden tárbıe alyp, kolledjde oqyp ma­man­dyq ıesi atanǵan Gúlim baqyttyń jolyna tús­ken­deı edi. О́rimdeı jigitpen tanys­qanda, armanyndaǵy jigitti jolyqtyrǵandaı sengen. Sezim jeteginde júrgen jastar sábıli bolatyndaryn bilgennen keıin baryp, otbasyn qurýǵa qadam jasaıdy. О́kinishtisi, jigittiń áke-sheshesi jas kelinniń jetim qyz ekenin betine basyp bosaǵa­la­rynan attatpaı qoıa­dy. Aıa­ǵy aýyr jas qyz osylaısha taǵdyrdyń tezinde qala bergen...

Gúlim «Analar úıine» kelgenge deıin balasyna qujat ta jasata almaǵan eken. Tıis­ti jár­demaqy alýdyń da múm­kindigi bolmaǵan. Qazir jaǵ­daıy túzeldi. Qaısar mi­nezdi Gúlim basyna túsken ja­ǵdaıdy jurttan jasyrmaı, oblystyq «Jetisý» tele­arnasyndaǵy «Bolmys» tok-shoýyna qatysqan bolatyn. Osy baǵdarlama Gúlimniń taǵ­dy­ryn túbegeıli ózgert­keni anyq.

Telebaǵdarlamany kór­gen oblys ákimi Amandyq Batalov Gúlimniń jaǵdaıyna alań­daýshylyq bildiripti. «Ana­lar úıin» panalaǵan jas ananyń jaıyn bilýge orynbasary Jaqsylyq Omardy arnaıy jum­saǵan. Máseleniń mánin uqqan A.Batalov Gúlimdi arnaıy qabyldaýyna shaqyrdy. Sábıin kóte­rip kelgen jas anaǵa ákelik qur­met kórsetip, balanyń baıǵazysyna Taldy­qorǵannan páter beretinin aıtty.

Endi Gúlim Núrkebaeva 6 aıǵa jalǵasatyn ońaltý sha­ra­synan ótip, tıisti em-dom qabyl­daǵannan keıin jór­gektegi balasymen birge jańa pá­ter­diń bosaǵasynan attaıtyn boldy.

Qalmahanbet MUQAMETQALI,
«Egemen Qazaqstan»

Almaty oblysy