Osy ýaqytqa deıin otandyq mamandar bul is boıynsha 4 ret saraptama júrgizgen. Endi jábirlenýshi tarapynan shaqyrtylǵan amerıkalyq mamandardan quralǵan besinshi top Jambyl oblysynyń qylmystyq ister boıynsha mamandandyrylǵan aýdanaralyq sotynda ótken Toqmádı isine baılanysty sotqa qatysyp, ózderi jasaǵan saraptama qorytyndylaryn jarııa etti.
Sot barysynda amerıkalyq táýelsiz krımınalıst sarapshy Irıs Dellı Murathan Toqmádı Erjan Tátishevti 12 santımetr qashyqtyqta atyp óltirgenin málimdedi. Jıyrma jyldan beri kisi ólimin tergeýde tájirıbeli mamanǵa aınalǵan Irıs Dellı kólik ishindegi kisi ólimin anyqtaý úshin modeldi anımasııa jasap, kólik salonynyń kólemin syzǵan. «Qarý kóliktiń artynda otyrǵan adam arqyly qoldanylǵan. Naqty aıtsam, oq tıgen adamnyń basy men atylǵan qarýdyń qashyqtyǵy 12 santımetr. Bul maksımaldy ólshem. Tym jaqyn degenniń ózinde 6 santımetr bolady», dedi Irıs Dellı.
Aıta keteıik, sheteldik mamandar Jambyl oblysynyń Qordaı aýdanyna qarasty Otar jazyǵyndaǵy qylmys bolǵan jerde zertteý jumystaryn júrgizgen eken. Alaıda saraptama tobynyń jetekshisi Maıkl Patrık sot barysynda «Zaýer» markaly nemis vıntovkasynyń ózdiginen atylmaǵanyn aıtty. Táýelsiz krımınalıst sarapshy 12-shi kalıbrli vıntovka óte qymbat qarý ekenin, onyń ózdiginen atylmaıtynyn, sondaı-aq qarý tazalaıtyn adammen tildeskenin, ol qarýdyń jaǵdaıynyń jaqsy bolǵanyn aıtqanyn da jarııalady.
«Biz bul isti kompıýterlik modýlder arqyly zerttedik. Erjan Tátishevti kóliktiń artynda otyrǵan adam atqan. О́ltirýge ádeıi árekettengen. Al janyndaǵy adamnyń bul iske qatysy joq. Róldegi adam aldyna qarap kele jatqanda atyp óltirilgen. Buǵan oqtyń ushýy men marqumnyń mı suıyqtyǵynyń shashylý baǵyty dálel», dedi shırek ǵasyr boıy kisi óliminiń sebepterin ashýǵa mamandanǵan Maıkl Patrık.
Amerıkalyq sarapshy mamandardyń pikiri osyndaı. Jambyl oblysynda Murathan Toqmádıdiń isine qatysty sot prosesi áli jalǵasýda. Jábirlenýshi taraptyń arnaıy shaqyrtýymen kelgen sheteldik mamandardyń pikirinshe, Tátishevke oq artynan atylǵan bolyp otyr. Eske sala keteıik, Toqmádı KTK arnasyndaǵy arnaıy derekti fılmde de Tátishevti kóliktiń artynda otyryp atqanyn aıtqan bolatyn.
Hamıt Esaman,
«Egemen Qazaqstan»
Jambyl oblysy
