70-jyldary Qazaq televıdenıesinde jáne Qazaq radıosynda kommentator bolyp jumys istedi. Ana tilimizde barlyq sport túrlerinen reportaj júrgizdi. Almatynyń Ortalyq stadıonynan tikeleı efırde alǵash ret qazaqsha reportaj júrgizip, esimi qazaq sporty tarıhynda qaldy. Sportty jan-tánimen súıetin, qazaq tilin aıryqsha qurmetteıtin aǵa býyn ókili edi. Ana tilimiz úshin shyj-byj bolyp júrgenin talaı ret kórdik. Negizi, Sultanǵalı aǵa til mamany bolatyn. Lıngvıstıkany óte jaqsy meńgergen edi. Bir ǵana «bet» sóziniń 24 sınonımi bar dep, qazaq tiliniń óte baı ekendigin naqty derektermen dáleldep otyratyn. Sonyń arqasynda qazaq kommentatorlyǵy men sport jýrnalıstıkasyna kóptegen tyń termınder engizgen. Sultanǵalı Qarataıulynyń sport jýrnalıstıkasyndaǵy eńbegi – ushan-teńiz.
Sonymen qatar, sazgerligi de bar. О́leń de shyǵaratyn. О́miriniń sońǵy kezinde ǵana patrıottyq turǵydaǵy án-jyrlaryn kópshilike usynyp júrdi. Qolyna bir is alsa, sony sońyna deıin jetkizýge tyrysatyn. О́te tııanaqty, kirshiksiz adam edi. Úlkendi, aǵa býyndy qurmettep, qatty syılaıtyn. Jastarǵa «aǵa býyndy qadirleńder, aldynan ótpeńder» dep ósıetin aıtyp otyratyn. О́te qarapaıym, aqkóńil, aqjarqyn adam edi. Eldiń bárimen kúlip sóılesýge tyrysatyn. Ázil-qaljyńy qandaı edi?! Jastarǵa aqylyn aıtyp otyratyn. Qosh, aǵa! Turlaýsyz mynaý ómirden Sultanǵalı aǵamyz da ozypty. Janyńyz jánnatta bolsyn! Sizdiń esimińiz qazaq sporty tarıhynda máńgilikke saqtalyp qalady. Oqyrmandarymyzdyń atynan týma-týystaryna, jaqyndaryna jáne otbasyna qaıǵyryp, kóńil aıtamyz.
